Во Киев, последните напади оставија трагични последици – бројот на загинати се искачи на 24, додека над 130 лица се повредени. Спасувачките екипи и натаму извлекуваат тела од урнатините, а украинските служби информираат дека биле цел на 27 различни локации во градот. Во оваа масивна офанзива биле употребени околу 440 дронови и над 30 ракети, што ја прави една од најинтензивните досега.
Живеам во оваа зграда, а таму беше и мојата колешка, готвачка. Не знам дали е жива. Таа беше со нејзиниот зет. Се обидувам да дознаам нешто повеќе.
Останавме без прозорци и врати, но барем сме живи. Не постојат зборови што можат да го доловат хоророт кој го преживеавме.
Структурите кои претставуваат опасност за иднина ќе бидат срушени по проценка на експертите. Сè уште траат активности за пребарување на преживеани и евентуално загинати.
Од Европската Унија пристигна сериозно предупредување – Каја Калас изјави дека Русија е непосредна закана за континентот. Таа порача дека Европа мора да остане единствена во заштитата на своите граѓани наспроти зголемените воени трошоци и постојаните закани од саботажа и кибер-напади.
Европа е нападната. Нашиот континент е во свет кој станува сè поопасен. Но нашата волја за заедничко делување е силна. Имаме 27 демократии и различни мислења, но она што нè обединува е целта да ги заштитиме нашите граѓани.
Американскиот Стејт департмент потврди дека еден американски граѓанин загинал во нападите. Портпаролката Тами Брус изрази сочувство до сите жртви и нивните семејства, силно осудувајќи ги нападите.
Свесни сме за нападот врз Киев со бројни жртви, меѓу кои и еден американски државјанин. Овие напади ги осудуваме и изразуваме најдлабоко сочувство.
Украина прогласи Ден на жалост поради трагедијата. Претседателот Володимир Зеленски ги опиша нападите како „чист тероризам“ и ја обвини руската страна за страдањата. Во исто време, Северна Кореја најави испраќање воен персонал и деминери во регионот Курск за обнова по украинските напади, додека Јужна Кореја ја осуди акцијата како кршење на санкциите и побара итна реакција.
Светските медиуми известуваат дека Северна Кореја веќе има ангажирано своја логистичка и воена поддршка за руските операции во Украина.
© Vecer.mk, правата за текстот се на редакцијата
