Во 2022 година, Русија формираше строго доверлива единица составена од елитни разузнавачки агенти за извршување атентати, киднапирања и саботажи во странство. Групата беше разоткриена откако еден од нејзините офицери користеше Google Translate.
Единицата, интерно позната како Центар 795, беше формирана по наредба на рускиот Генералштаб во декември 2022 година, како дел од напорите за проширување на разузнавачките операции по инвазијата на Украина. Според извори на Insider, таа беше дизајнирана да функционира како „армија во сенка“ и доби целосна автономија, што ѝ овозможи да ја заобиколи бавната и неефикасна бирократија на Министерството за одбрана.
Иако директно му известуваше на началникот на Генералштабот Валериј Герасимов, единицата работеше во рамките на концернот „Калашников“, приватен руски производител на оружје. Покрај обезбедувањето на фронтот за единицата, компанијата ѝ обезбеди и оперативна база во административната зграда на воено-индустрискиот комплекс „Патриот Парк“ во близина на Москва.
Извори за „Инсајдер“ наведуваат дека „идеолошки архитект и главен спонзор“ на Центарот 795 е милијардерот и трговец со оружје Андреј Бокарев, кој до 2018 година беше ко-сопственик на контролниот пакет акции во Калашников.
Елитни агенти и невидени плати
Центарот ги регрутирал најискусните агенти од неколку гранки на руските безбедносни служби и наводно има околу 500 офицери. На чело е Д.Ф., 52-годишен ветеран од специјалните сили на ФСБ Алфа група. Преку „строга“ постапка за селекција, околу една третина од кандидатите биле одбиени бидејќи не успеале да се докажат „на уникатен начин“.
Центарот 795 бил овластен да регрутира офицери од разни други единици на војската, ГРУ, ФСБ, Росгвардија, па дури и ФСО, елитните безбедносни сили на Кремљ - без нужно да се согласи со матичната агенција. Ова му дава на Центарот 795 релативно повисок статус во внатрешната хиерархија на руските специјални служби.
Според протечените даночни документи, избраните офицери добиле надомест „невиден во руската војска“. Менаџерите на одделот заработувале околу 7.800 долари месечно, додека годишната плата на Фисенко била околу 500.000 долари.
Од ликвидации до киднапирања
Офицерите на единицата се поделени во три дела: Разузнавање, Напад и Борбена Поддршка. „Организациската структура и изборот на персонал укажуваат дека целите на единицата биле јасно поврзани со транснационална репресија и насочена неутрализација под превезот на корпоративно негирање“, наведува „Инсајдер“.
Како пример, новинарите ги посочуваат снајперските тимови, единици кои се дел од Дирекцијата за разузнавање, што е „структурен избор што сугерира дека нивната примарна улога не е огнена поддршка на бојното поле, туку насочена ликвидација“.
Според весникот, Центарот 795 е дизајниран да извршува широк спектар на операции, од воени операции во Украина до политички атентати и киднапирања на критичари на Кремљ во странство.
Фатална грешка со Google Translate
Неодамнешното разоткривање на еден агент „сигурно ќе создаде долгорочни проблеми“ за единицата. Офицерот Д.А. бил уапсен на аеродромот во Богота, Колумбија, на 24 февруари оваа година. Тој е обвинет за организирање обиди за атентат врз најмалку двајца истакнати чеченски дисиденти во Европа.
Според весникот „Инсајдер“, Д.А. ангажирал платен убиец - Д.Ѓ., кој зборува српско-хрватски јазик и живее во Соединетите Американски Држави - и понудил награда од 1,5 милиони долари за секоја цел успешно „депортирана во Русија“, жива или мртва.
Сепак, операцијата имала фатална маана: Д.А. и Д.Ѓ. не зборувале ист јазик и се потпирале на Google Translate. Иако комуницирале преку шифрирана апликација, копирањето и лепењето на нивните пораки во преведувачот создало трага од нешифриран текст на серверите на Google. Откако добиле налог за следење на записите за превод, агентите на ФБИ можеле да ги следат нивните комуникации во реално време.
Д.А. моментално е во притвор во Колумбија, чекајќи екстрадиција во Соединетите Американски Држави, каде што се соочува со обвиненија за заговор за киднапирање и убиство и заговор за финансирање на тероризам, што може да донесе доживотна казна затвор. „Најтајната единица на руската воена разузнавачка служба не беше соборена од дезертер или крт, туку од јазична бариера и судска наредба“, заклучува „Инсајдер“.
© Vecer.mk, правата за текстот се на редакцијата
