Новинарите постојано им поставуваат прашања на светските лидери.
Ништо посебно. Нели?
Но, како е да му се постави тоа прашање на Владимир Путин - претседателот кој нареди целосна инвазија на Украина, лидерот чија земја оваа недела шефот на МИ6 ја обвини за „извоз на хаос“?, прашува Стив Розенберг, долгогодишен дописник на Би-Би-Си во Москва.
Па тој продолжува:
„И замислете да го поставите тоа прашање во живо на телевизија, додека милионска публика во Русија ве гледа.
Тоа е голема одговорност. Не сакате да направите грешка.
„Моето прашање се однесува на иднината на Русија. Каква иднина планирате за вашата земја и вашиот народ?“, го праша тој претседателот Путин.
„Дали таа иднина ќе личи на сегашноста, во која секое јавно отстапување од официјалната линија е казнето со закон? Дали ловот на непријатели дома и во странство ќе се забрза? Дали прекините на мобилниот интернет ќе станат уште почести? Дали ќе има нови „специјални воени операции“?
Додека јас зборувам, опишува тој, Владимир Путин си води белешки. А потоа одговара.
Го брани репресивниот закон на Русија за странски агенти. Стотици Руси кои ја критикуваат владата се прогласени за „странски агенти“.
„Ние не го измисливме тој закон“, вели Путин.
„Тој закон за странски агенти беше донесен во голем број западни земји, вклучително и Америка, уште во триесеттите години од минатиот век. И сите тие закони, вклучително и американскиот, се многу построги...“
Негодување кон Западот
Всушност, рускиот закон е драконски, објаснува Розенберг. Тој ги исклучува „странските агенти“ од бројни области на јавниот живот - вклучувајќи образование, државна служба, избори и јавни настани. Наметнува финансиски и имотни ограничувања. Кривично гонење може да следи веќе по една административна казна.
Но, како што наведува, не можел да му го посочи тоа на претседателот Путин. Микрофонот му беше одземен штом го заврши своето прашање.
Модераторот одеднаш интервенира и ја менува темата.
„Имаме уште едно прашање: „Што ќе се случи со Би-Би-Си? Се соочува со тужба од повеќе милијарди долари од американскиот претседател?“, вели водителот Павел Зарубин.
„Мислам дека претседателот Трамп е во право“, потврдува претседателот Путин.
Кремљ и Белата куќа - на иста линија... кога станува збор за Би-Би-Си.
Потоа Путин се враќа на прашањето на Розенберг.
„Дали ќе има нови специјални воени операции? Не ако се однесувате кон нас со почит и ги почитувате нашите интереси, исто како што отсекогаш се обидувавме да правиме со вас. Освен ако не нè излажете, како што направивте со источната експанзија на НАТО.“
На сите им е очигледно што го движи Владимир Путин - длабоко вкоренето негодување кон Западот, пишува Розенберг.
Тој тврди дека со години западните лидери покажувале непочитување кон Русија, ја измамувале и лажеле - и дека тие сè уште лажат денес кога тврдат дека Москва има намера да ја нападне Европа.
„Каква глупост е ова?“, вели лидерот на Кремљ.
Недоверба кон Москва
Но, многу европски лидери едноставно не ѝ веруваат на Москва.
Ве потсетуваме дека во пресрет на целосната руска инвазија на Украина, руските претставници негираа дека имаат планови за масовен напад.
Неодамна, Русија беше обвинета за нарушување на европскиот воздушен простор со борбени авиони и беспилотни летала, како и за сајбер напади и саботажи.
Но, додека го завршуваше својот одговор на прашањето на Розенберг, Путин го кажа и следново:
„Подготвени сме веднаш да ги прекинеме непријателствата под услов да се обезбеди среднорочната и долгорочната безбедност на Русија и сме подготвени да соработуваме со вас.“
„Дали тоа беше маслиново гранче за Европа од устата на рускиот претседател?“, прашува Розенберг.
Сепак, ако Москва продолжи да ја поврзува својата долгорочна безбедност со максималистичките барања кон Украина, европските лидери ќе останат скептични, заклучува тој.
© Vecer.mk, правата за текстот се на редакцијата
