Владејачката Лабуристичка партија на британскиот премиер Кир Стармер се соочи со сериозни загуби на почетокот на локалните избори во Англија, додека најголем раст забележа антиимиграциската партија „Реформа“, предводена од Најџел Фараж, пренесува Ројтерс. Првичните резултати покажуваат дека лабуристите ја губат поддршката во своите традиционални упоришта во централна и северна Англија, како и во одредени делови на Лондон. Спротивно на нивниот пад, Реформската партија направи вистински пробив, освојувајќи повеќе од 200 места во локалните совети, со што дополнително се етаблира на политичката сцена.
Аналитичарите оценуваат дека овие резултати се јасен сигнал за слабеење на традиционалниот двопартиски систем во Британија и укажуваат на сè поголема фрагментација на политичката сцена. Покрај успехот на Фараж, забележителен раст на поддршката има и кај помалите и регионалните партии, вклучувајќи ги Зелените, како и националистичките партии во Шкотска и Велс. Овој изборен тренд сугерира дека британските гласачи сè повеќе се свртуваат кон алтернативни политички опции, со што значително се отежнува доминацијата на големите политички групации.
© Vecer.mk, правата за текстот се на редакцијата
