Ниту една иранска делегација досега не отпатувала за Пакистан за да учествува во новиот круг разговори со Соединетите Американски Држави, објави агенцијата „Анадолија“ повикувајќи се на информација од иранскиот државен сервис „ИРИБ“. Официјалниот извештај децидно ги демантира меѓународните медиумски написи, нагласувајќи дека во Исламабад не е пристигната ниту главната, ниту која било помошна или секундарна делегација. Телевизијата ги оцени како невистинити информациите дека биле закажани конкретни термини за преговори во текот на понеделникот или вторникот.
Иранската страна останува на ставот изнесен уште во неделата вечерта, според кој понатамошното учество во какви било разговори зависи исклучиво од промената на однесувањето на Американците. Официјален Техеран јасно порача дека одбива да преговара под сенка на закани.
Овој застој доаѓа во критичен момент, со оглед на тоа што 14-дневното примирје, кое беше договорено со посредство на Пакистан, истекува веќе во среда.
Ситуацијата дополнително ја отежнува цврстиот став на американскиот претседател Доналд Трамп, кој изјави дека е сосем малку веројатно дека ќе го продолжи примирјето. Тој нагласи дека поморската блокада ќе остане во сила сè додека не се постигне конечен договор за траен прекин на војната која започна на 28 февруари.
Иако дипломатските напори во Исламабад продолжуваат, неизвесноста околу новиот круг преговори останува висока додека часовникот отчукува до истекот на прекинот на огнот.
© Vecer.mk, правата за текстот се на редакцијата
