Алјаска е идеално место за историскиот самит на лидерите на Русија и САД, изјави специјалниот претставник на рускиот претседател за инвестиции и економска соработка со странски земји и директор на Рускиот фонд за директни инвестиции Кирил Дмитриев.
Тој додаде и дека многу земји заинтересирани за продолжување на конфликтот ќе се обидат да го нарушат.
„САД и Русија се оддалечени само 3,8 км една од друга, тоа е растојанието помеѓу Диомедовите острови, кои се одделени со Меѓународната линија за промена на датумот (на едната е вчера, на другата утре). Ајде мирно да преминеме од вчера кон утре“, напиша Дмитриев на социјалната мрежа X.
Тој, исто така, ги повика земјите да развијат соработка на Арктикот и пошироко.
„Родена како Руска Америка, со православни корени, утврдувања и трговија со крзно, Алјаска ги одразува тие врски и ги прави САД арктичка земја. Ајде да соработуваме во заштитата на животната средина, инфраструктурата и енергијата на Арктикот и пошироко“, повика Дмитриев.
Претходно, помошникот на рускиот претседател, Јуриј Ушаков, објави дека средбата меѓу Путин и Трамп ќе се одржи на 15 август во Алјаска.
Претходно, Трамп објави на социјалната мрежа Истина дека на 15 август ќе се сретне со рускиот Путин во Алјаска, држава во САД. Дополнителни детали ќе бидат објавени подоцна, напиша Трамп.
Да ве потсетиме дека претседателот на Русија, Владимир Путин, го прими специјалниот претставник на американскиот претседател, Стив Виткоф, во Кремљ во среда. По средбата, помошникот на рускиот претседател, Јуриј Ушаков, потврди дека Москва и Вашингтон се договориле за средба меѓу Путин и Трамп во наредните денови, а подготовките веќе се започнати.
Алјаска е најсеверната и најголема американска држава. Откриена е од руска експедиција во 1732 година, а Руската империја ја продала на Соединетите Американски Држави во 1867 година.
© Vecer.mk, правата за текстот се на редакцијата
