Голем пожар избувна на главната сцена на музичкиот фестивал Tomorrowland во Белгија, само неколку дена пред да започне. Пожарот го зафати поголемиот дел од пејзажот, а густ чад се надвиснуваше над градот Бое, кој се наоѓа помеѓу Брисел и Антверпен, објавија британските медиуми.
Фестивалот, кој собира околу 400.000 посетители од целиот свет, требаше да започне во петок, што им остава многу малку време на организаторите да ја санираат штетата.
Патем, станува збор за фестивал каде што настапуваат најголемите светски диџеи, а повеќето од нив се „преселуваат“ токму од Ultra во Сплит во Tomorrowland. Меѓу другите, беа најавени и Хардвел, Мартин Гарикс и Џон Самит.
Во моментот на пожарот, во просторот немало публика, но таму престојувале околу 1.000 членови на персоналот на фестивалот. Засега не е познато дали има повредени, а на жителите од околните области им е советувано да ги затворат своите прозорци и врати.
Снимките од местото на настанот брзо ги преплавија социјалните медиуми, покажувајќи ја иконската главна сцена во пламен. Започната е голема операција за ставање под контрола на пожарот, а службените лица сè уште не се сигурни дали поправките можат да се извршат на време за денот на отворањето.
Се чини дека сценографијата, која наводно била создавана една година, била сериозно оштетена.
Очевидци тврдат дека слушнале пукање слично на огномет пред да започне пожарот, што укажува на можна поврзаност со тестирањето на топовите за огномет.
Сепак, точната причина за пожарот сè уште не е утврдена, пишуваат белгиските медиуми.
Фото: Х
© Vecer.mk, правата за текстот се на редакцијата
