Претседателот на Соединетите Американски Држави, Доналд Трамп, ја обвини поранешната потпретседателка на САД, Камала Харис, дека ѝ платила на пејачката Бијонсе 11 милиони долари за „нелегална“ поддршка за време на изборите во 2024 година.
Тој повика на „голема истрага“ за луѓето кои ја поддржувале Харис, тврдејќи дека биле нелегално платени за јавно да ја поддржат нејзината претседателска кандидатура.
Трамп тврдеше дека на Бијонсе ѝ биле платени 11 милиони долари за да се појави на сцената со Харис на предизборен митинг во Хјустон, но дека била исвиркана од сцената затоа што не извела ниту една песна.
„Ова е нелегална изборна измама на највисоко ниво! Тоа е нелегален придонес во кампањата! Брус Спрингстин, Опра, Боно и веројатно многу други имаат многу објаснувања да дадат!!!“ Трамп напиша на својата социјална мрежа Truth Social.
Тој ја обвини својата противничка на претседателските избори, Камала Харис, дека плаќала за поддршка на познати личности со пари од кампањата.
„Колку Камала Харис му плати на Брус Спрингстин за лош настап за време на нејзината претседателска кампања? Зошто ги прифати тие пари ако е толку голем обожавател на неа? Не е ли тоа огромен и нелегален придонес за кампањата? Што е со Бијонсе?... И колку отидоа кај Опра и Боно???“, напиша Трамп со големи букви на својата социјална мрежа Truth Social.
Тој додаде дека ќе нареди „обемна истрага“ за случајот, бидејќи, како што изјави, „на кандидатите не им е дозволено да плаќаат за поддршка, што Камала го правеше, под маската на плаќање за забава“.
„Ова беше многу скап и очаен обид вештачки да се зголеми бројот на нејзините ретки поддржувачи. Тоа не е легално! За овие непатриотски „забавувачи“, ова беше само корумпиран и нелегален начин да се искористи расипаниот систем“, заклучи Трамп.
Неколку недели пред изборите во ноември, Харис доби поддршка и од музичката легенда Стиви Вондер во Џонсборо, Џорџија, а неколку дена подоцна во Атланта, таа и поранешниот претседател Барак Обама одржаа митинг на кој настапи Брус Спрингстин, а зборуваа и познатиот режисер Спајк Ли и актерот Семјуел Л. Џексон, објави „Вашингтон тајмс“.
© Vecer.mk, правата за текстот се на редакцијата
