Пензиониран американски генерал, кој раководел со координацијата на воената помош за Украина, оставил класифицирани карти во воз во Европа и доживеал потрес на мозокот по падот предизвикан од прекумерно пиење за време на официјална вечера во Украина. Извештајот на генералниот инспектор на Министерството за одбрана на САД го открива ова, пишува „Киев Индепендент“.
Тајни карти оставени во возот
Во извештајот од 50 страници, датиран на 12 март, се тврди дека пензионираниот генерал-мајор Антонио Агуто Јуниор, поранешен командант на Групата за безбедносна помош за Украина (САГ-У) со седиште во Германија, ги прекршил прописите за ракување со класифицирани материјали.
За време на патувањето во Киев во март 2024 година, Агуто, спротивно на правилата, го доверил надзорот врз класифицираните карти на персоналот, наместо на дипломатскиот курир.
Групата САГ-У, основана во ноември 2022 година со околу 300 членови, е задолжена за координирање на обуката и опремувањето на украинските вооружени сили од Висбаден, Германија.
За време на враќањето на групата на Агуто во Германија, карти означени како тајни биле оставени во украинскиот воз. Тие биле складирани во необезбедено шкафче и биле пронајдени и вратени денот откако биле пријавени како исчезнати.
„Амбасадата на САД во Украина пронашла класифицирани документи без надзор во воз кој се вратил во земјата еден ден подоцна. Генерал-мајор Агуто ја презел одговорноста за инцидентот“, се вели во извештајот.
Потрес на мозокот по пијанство
Во одделен инцидент еден месец подоцна, на 14 мај 2024 година, Агуто покажал знаци на „прогресивно влошување“ за време на состанокот со тогашниот државен секретар на САД, Ентони Блинкен, и амбасадорката на САД во Украина, Бриџит Бринк.
Истрагата на главниот инспектор утврдила дека однесувањето на Агуто е резултат на потрес на мозокот што го добил по неколку падови претходната ноќ.
Несреќите следеле по вечера на 13 мај, опишана како официјален воен настан, каде што Агуто и негов соработник, чиј идентитет е сокриен, испиле две шишиња жестоки пијалоци, кршејќи ги правилата на Министерството за одбрана за консумирање алкохол.
„Собраните докази укажуваат дека генерал-мајор Агуто претрпел умерен до тежок потрес на мозокот предизвикан од повреди на главата здобиени при најмалку еден, ако не и сите три, падови доцна навечер на 13 мај и утрото на 14 мај“, се вели во извештајот.
Поради идентификуваните пропусти, генералниот инспектор препорача секретарот на армијата да преземе „соодветни мерки“ против Агуто.
Случајот со губењето на класифицирани документи беше проследен до Канцеларијата за специјална безбедност на Европската команда на САД. Агуто ја предаде командата над групата на SAG-U во август 2024 година, кратко пред неговото пензионирање од војската.
© Vecer.mk, правата за текстот се на редакцијата
