Американскиот федерален суд во петокот ја поништи одлуката на Пентагон да им забрани пристап на одредени новинари, потврдувајќи ја тужбата на „Њујорк тајмс“ во која се тврдеше дека станува збор за неуставен чин.
Во декември, медиум од Њујорк поднесе тужба тврдејќи дека ограничувањата на Пентагон за пристап до одредени медиуми го кршат Првиот амандман на Уставот, кој гарантира слобода на изразување.
„Њујорк тајмс“ тврдеше дека промените од минатата година му дале на министерството одврзани раце да го блокира пристапот на новинарите и медиумите за известување што не му се допаѓа. Владата го оспори таквиот опис, тврдејќи дека политиката е разумна и неопходна за националната безбедност, пишува „Ројтерс“.
Судија: Политиката го крши Уставот
Судијата на окружниот суд во Вашингтон, Пол Фридман, пресуди дека значаен дел од новата политика за акредитација на Пентагон навистина крши неколку амандмани на Уставот.
Во октомври, Пентагон објави барање до новинарите повеќе да не бараат или објавуваат одредени информации без изрична дозвола, заканувајќи им се со повлекување на нивната акредитација доколку одбијат, објавува агенцијата „Франс прес“.
Во измените, одобрени од министерот Пит Хегсет, се наведува дека новинарите можат да се сметаат за безбедносен ризик ако го охрабруваат воениот персонал да открива класифицирани, а во некои случаи и некласифицирани информации.
Министерството за војна избрка осум медиумски куќи
Пентагон, поранешното министерство за одбрана кое претседателот Доналд Трамп го преименува во воено министерство, избрка осум медиумски куќи, вклучувајќи ги „Њујорк тајмс“, „Вашингтон пост“ и „Си-Ен-Ен“, од своите канцеларии наменети за новинари во последните месеци.
Во моментов, тие се претежно членови на десничарските медиуми кои се согласија со новата политика на министерството.
„Принцип стар речиси 250 години не смее да се напушти сега“
„Авторите на Првиот амандман сметаа дека безбедноста на нацијата бара слободен печат и информиран народ и дека оваа безбедност е загрозена кога владата го потиснува политичкиот говор“, се вели во образложението на судската одлука.
„Тој принцип ја одржува нацијата безбедна речиси 250 години. Не смее да се напушти сега“, додаде Фридман.
Тој нагласи дека е свесен дека „националната безбедност мора да биде заштитена“, како и безбедноста на трупите и воените планови.
„Но, особено во светлината на неодамнешниот упад во Венецуела и тековната војна во Иран, поважно е од кога било јавноста да има пристап до информации од различни перспективи за да знае што прави нивната влада“.
Граѓаните на тој начин можат „да ја поддржат политиката на владата ако сакаат или да протестираат против неа“ и „врз основа на целосни и отворени информации да одлучат за кого ќе гласаат на следните избори“, заклучи судијата.
Пентагон ја објави жалбата
Тој му наложи на Пентагон веднаш да ги обнови акредитациите на седум новинари на „Њујорк тајмс“. Портпаролот на тоа тело, Шон Парнел, објави на социјалните мрежи дека владата не се согласува со новата одлука и ќе поднесе жалба против неа.
© Vecer.mk, правата за текстот се на редакцијата
