Париз подлегна на смртоносен топлотен бран што предизвика незамисливи услови во мртовечниците. Сите места се полни, а телата се транспортираат дури 80 километри од градот за да бидат погребани таму.
Зухер Ертели, сопственик на мртовечница во близина на аеродромот Орли, добива телефонски повик на секои неколку минути. Секогаш е истото прашање: „Дали сè уште има место?“. Одговорот е секогаш ист - не! Сите 32 места во неговиот ладилник се полни.
- Навистина се соочуваме со катастрофална ситуација. Добивам стотици повици дневно - вели Ертели.
Тој објаснува дека погребалните компании мора да транспортираат тела на далечни локации, дури и до Шартр, место оддалечено околу 80 километри од Париз, но и до други региони околу главниот град. За да создаде барем малку дополнителен простор, Ертели побара дозвола да постави ладилници пред мртовечницата, но сè уште чека одобрение од властите.
- Семејствата страдаат. Немаме што да им понудиме бидејќи погребалните агенции се полни. Сочувствуваме, но немаме решение - додава Ертели.
Повеќе од 1.400 мртви за еден ден
Франција проценува дека бројот на жртви за време на разорниот топлотен бран се зголемил за најмалку 500 луѓе, а тоа е конзервативна, прелиминарна проценка. Повеќе од 1.200 луѓе починале на најжешкиот ден во француската историја, 23 јуни, со што го срушиле рекордот поставен само еден ден претходно. Следниот ден, бројот се искачи на повеќе од 1.400, а потоа повторно на 25 и 26 јуни беа регистрирани околу 1.400 смртни случаи. Пред топлотниот бран, дневниот просек беше помеѓу 900 и 1.000 смртни случаи.
Околу 85 проценти од починатите биле над 65 години. Бројот на смртни случаи дома во парискиот регион се зголеми за околу 40 проценти. Службата за итни случаи во Париз за само еден ден примила околу 3.400 повици, четири пати повеќе од вообичаеното, а регистрирани се и 30 случаи на срцев застој објави агенција Santé publique France.
Почина сама, изолирана, без помош
Париската погребална работничка Вероник Бертан опишува што им е заедничко на починатите кои минуваат низ нејзините раце.
- Повеќето од починатите со кои моментално се справуваме биле луѓе кои живееле сами, изолирани. Со оглед на околностите во кои биле пронајдени, не може да се заклучи поинаку освен дека станува збор за смртни случаи предизвикани од топлината - вели Вероника.
Трагедијата не ги заобиколи ниту најмладите. Во департманот Ивлин, западно од Париз, 12-годишно девојче почина од топлотен удар, додека лекарите успеаја да го спасат нејзиниот 15-годишен брат. Низ цела Франција, 74 лица се удавија барајќи освежување од екстремните температури - една од жртвите е маж кој влегол во парискиот канал Сен Мартин надвор од означената зона за пливање.
Сенката на 2003 година и предупредување за иднината
Имаше предупредувања. Топлинскиот бран од 2003 година, кој беше поблаг од овој, одзеде околу 15.000 животи во Франција и предизвика национална реформа на грижата за стари лица. Бертан апелира оваа лекција да не се заборави повторно.
- Со текот на годините, можеби заборавивме дека може да се случи повторно и дека работите би можеле да бидат уште полоши - предупреди Бертан.
Франција традиционално има резервиран став кон климатизацијата, па само околу една четвртина од домаќинствата поседуваат клима уред. Тој удел во Шпанија и Италија е околу 50 проценти, а во САД и Јапонија околу 90 проценти.
© Vecer.mk, правата за текстот се на редакцијата
