Претседателот на САД, Доналд Трамп, вели дека наредил две нуклеарни подморници да бидат „позиционирани во соодветни области“ како одговор на „многу провокативните“ коментари на поранешниот руски претседател Дмитриј Медведев.
Трамп рече дека дејствува „за секој случај“.
„Зборовите се многу важни и често можат да доведат до несакани последици и се надевам дека ова нема да биде еден од тие случаи“, додаде Трамп.
Тој не прецизираше каде се распоредени подморниците, во согласност со американскиот воен протокол.
Медведев неодамна издаде остро предупредување до Соединетите Држави, одговарајќи на ултиматумите на Трамп до Москва да се согласи на прекин на огнот во Украина или да се соочи со сериозни санкции.
Русија и САД имаат најголеми арсенали на нуклеарно оружје во светот, а двете земји имаат флоти на нуклеарни подморници.
„Врз основа на многу провокативните изјави на поранешниот руски претседател Дмитриј Медведев, кој сега е заменик-претседател на Советот за безбедност на Руската Федерација, наредив распоредување на две нуклеарни подморници во соодветните региони“, напиша Трамп во објава на социјалната мрежа Truth Social.
Обраќајќи се пред новинарите истиот ден, американскиот претседател рече дека „е упатена закана, која тие не ја сметале за соодветна“.
„Затоа морам да бидам внимателен“, забележа Трамп, велејќи дека „го правам ова за безбедноста на луѓето, бидејќи заканата ја упати поранешниот претседател на Русија“.
„Ќе го заштитиме нашиот народ“, додаде американскиот претседател.
Кремљ сè уште не коментираше јавно за ова прашање, но московската берза нагло падна по изјавите на Трамп.
Трамп и Медведев неодамна се вклучија во серија лични навреди на социјалните медиуми, дополнително влошувајќи ги тензиите меѓу Вашингтон и Москва.
Американскиот претседател постави нов рок за Путин - да ја заврши војната во Украина до 8 август.
Но, Путин досега не покажа подготвеност да одговори.
Во понеделникот, Трамп објави рок од „10 или 12 дена“, додека на почетокот на јули се закани со високи тарифи за руската нафта и другиот извоз ако Москва не ја заврши војната во рок од 50 дена.
Медведев, кој беше руски претседател од 2008 до 2012 година, го обвини Трамп дека игра „игра на ултиматум“.
Тој, исто така, го опиша ултиматумот на Трамп како „претерано“, велејќи дека „На Русија не ѝ е гајле“.
Во изјава на Телеграм, Медведев предупреди на заканата од „мртва рака“ - што некои воени аналитичари го протолкуваа како алузија на кодното име за рускиот автоматски нуклеарен систем за одмазда.
Ова не е прв пат Трамп да одговори на коментарите на Медведев.
Тој претходно го опиша како „неуспешен поранешен руски претседател кој мисли дека е сè уште претседател“.
Тој, исто така, го предупреди да „внимава што зборува“, додавајќи дека „влегува во многу опасна територија“.
Медведев ја поддржува целосната инвазија на Русија врз Украина, започната во 2022 година, и е отворен критичар на Западот.
© Vecer.mk, правата за текстот се на редакцијата
