Рускиот претседател Владимир Путин му понуди на украинскиот претседател Володимир Зеленски да дојде во Москва на директни преговори, уверувајќи дека ќе му биде гарантирана безбедноста. Информацијата ја соопшти Јуриј Ушаков, помошник на Путин за надворешна политика, по телефонскиот разговор на рускиот претседател со норвешкиот премиер Јонас Гар Сторе и финскиот претседател Александар Стуб, пренесува руската новинска агенција ТАСС.
Според Ушаков, Путин порачал дека на Зеленски ќе му бидат обезбедени сите неопходни услови, вклучително и безбедноста, доколку одлучи да дојде во руската престолнина за директни разговори за завршување на војната во Украина.
Телефонскиот разговор меѓу Путин, Сторе и Стуб траел околу час и половина. Според информациите објавени од руските медиуми, една од главните теми била можноста за продолжување на преговорите меѓу Русија, Украина и Соединетите Американски Држави.
Ушаков изјавил дека разговорот бил опсежен и содржаен, а страните се согласиле повторно да разговараат доколку има потреба.
Изјавата на Путин доаѓа неколку дена откако Зеленски порача дека запирањето на борбите долж сегашната линија на фронтот може да биде реален начин за завршување на војната.
© Vecer.mk, правата за текстот се на редакцијата
