Високиот ирански функционер Џавад Лариџани изјави дека американскиот претседател Доналд Трамп повеќе не е безбеден да се сонча во својот луксузен дом во Флорида, предупредувајќи дека може да биде убиен додека лежи на плажата во Мар-а-Лаго.
„Трамп направи нешто што му отежнува да се сонча во Мар-а-Лаго. Додека лежи таму со стомакот свртен кон сонцето, мал дрон може да го погоди во папокот. Многу е едноставно“, рече Лариџани во изјава прикажана на иранската телевизија.
Изјавите следеа по појавата на „Крвав пакт“, онлајн платформа за собирање средства за она што го нарекува „казна за оние кои му се потсмеваат и му се закануваат на врховниот лидер Али Хамнеи“. Веб-страницата тврди дека досега собрала повеќе од 40 милиони долари, објави Иран Интернешнл, портал од Велика Британија.
„Ветуваме дека ќе доделиме награда на секој што може да ги изведе непријателите на Бога и оние кои му се закануваат на животот на Али Хамнеи пред лицето на правдата“, се вели во соопштението на почетната страница на „Крвав пакт“.
Кампањата има за цел да собере 100 милиони долари за да го убие Доналд Трамп. Не е јасно кој управува со локацијата.
Сепак, новинската агенција Фарс, поврзана со Револуционерната гарда, објави за започнувањето на иницијативата „Крвен пакт“ и ги повика религиозните групи во Иран и во странство да се соберат пред западните амбасади и централните плоштади за да изразат поддршка за Хамнеи.
Агенцијата, исто така, повика на примена на „исламски правила за мохаребе“ против Трамп и израелскиот премиер Бенјамин Нетанјаху.
Во правниот систем на Иран, мохаребе - буквално „водење војна против Бога“ - се казнува со смрт.
© Vecer.mk, правата за текстот се на редакцијата
