Данската премиерка Мате Фредериксен предупредува дека секој американски воен напад врз Гренланд би го загрозил НАТО и безбедноста на Европа, додека Трамп ја повторува стратешката важност на богатиот со минерали арктички остров.
Данската премиерка Мате Фредериксен издаде строго предупредување дека евентуалниот американски воен напад врз Гренланд би довел до крај на НАТО.
„Заканите на американскиот претседател Доналд Трамп за преземање на Гренланд треба да се сфатат сериозно“, изјави Фредериксен за ТВ2.
„Јасно велам, ако САД воено нападнат друга членка на НАТО, сè ќе престане - и НАТО и безбедноста што е воспоставена од крајот на Втората светска војна“, додаде премиерката, нагласувајќи дека анексијата на Гренланд би значела сериозно нарушување на меѓународниот поредок.
Претседателот Доналд Трамп долго време нагласува дека Гренланд, иако автономен, но формално дел од Данска и НАТО алијансата, претставува стратешка неопходност за САД.
„Ни треба Гренланд за национална безбедност“, им рече Трамп на новинарите на авионот „Ер Форс Уан“, без да ги прецизира деталите за своите планови, но додаде дека разговорите за островот ќе започнат за две недели.
Последните изјави на Трамп дојдоа откако САД започнаа напади врз Венецуела и го уапсија нејзиниот лидер Николас Мадуро, што предизвика стравувања во Европа дека Вашингтон би можел да биде охрабрен да преземе слични акции на Арктикот. Нордиските земји и Обединетото Кралство брзо ја изразија својата поддршка за правото на самоопределување на Копенхаген и Гренланд.
Гренланд е геостратешки важен поради неговата локација на Арктикот, богатите наоѓалишта на ретки минерали и американската воена база Туле, клучна за системот за противракетна одбрана. Иако островот има широка автономија, формално ѝ припаѓа на Данска, а жителите со децении дебатираат за можна независност.
© Vecer.mk, правата за текстот се на редакцијата
