Американскиот претседател Доналд Трамп изјави за време на гостувањето во ток-шоуто на Фокс њуз „Фокс и пријатели“, како одговор на прашање за осомничениот за убиството на Чарли Кирк, дека одговорил: „Мислам дека го имаме во притвор со висок степен на сигурност“.
Тој додаде дека лице „многу блиско на осомничениот“ го пријавило кај властите и дека повеќе информации ќе бидат објавени подоцна денес, јавува Си-Ен-Ен.
„Имаме лице за кое веруваме дека е оној што го бараме, но тој самиот се одвезе до полициската станица и сега е таму“.
Сепак, Трамп нагласи дека овие информации сè уште „подлежат на промена“.
Едно лице е во притвор и моментално е испрашувано во врска со фаталното пукање врз конзервативниот активист Чарли Кирк, изјавија четири извори запознаени со истрагата, јавува Си-Ен-Ен.
Според овие извори, лицето сè уште е испрашувано и не е формално обвинето. Два извори рекоа дека човекот во притвор му признал на својот татко дека тој е стрелецот.
Човекот кој моментално е во притвор и е испрашуван за убиството на Кирк е пронајден со помош на некој што го познавал, рече Трамп.
„Всушност, некој што бил многу близок со него го дојавил“, рече Трамп во емисијата „Фокс енд Френдс“ во петокот наутро.
„Тоа се случува кога имате некои од тие добри снимки“, додаде претседателот, осврнувајќи се на појасните фотографии од осомничениот објавени од ФБИ во четврток.
Трамп рече дека информаторот бил „лице поврзано со органите за спроведување на законот, но и личност од вера. Свештеник“.
Таткото на човекот во притвор соработувал со истражителите, рече Трамп.
Претседателот призна дека добил само краток брифинг пред интервјуто и рече: „Секогаш сум подготвен да бидам поправен, но зборувам од она што го слушнав“.
Трамп рече дека се надева дека лицето што го уби Кирк ќе добие смртна казна.
Во интервју за „Фокс енд Френдс“, каде што објави дека властите имаат осомничен во притвор, Трамп го опиша Кирк како „најдобрата личност“. „Тој не го заслужи тоа. Работеше напорно и се снајде добро, сите го сакаа.“
Тој рече дека вооружениот напаѓач заслужува најстрога казна.
„Па, се надевам, претпоставувам дека ќе биде прогласен за виновен и се надевам дека ќе добие смртна казна.“
Подоцна во интервјуто, тој додаде дека гувернерот на Јута, Спенсер Кокс, исто така, посочил дека ќе бара смртна казна во овој случај.
„Јута има смртна казна, а вие имате многу добар гувернер. Го запознав - тој е многу решен да добие смртна казна во овој случај.“
На прашањето дали ова е изолиран инцидент, Трамп рече „изгледа дека е.“
Тој исто така рече дека не сака да ги гледа снимките од пукањето, иако снимки од кампусот на Универзитетот во Јута, каде што се случи злосторството, се појавија на социјалните мрежи.
„Не сакав да гледам, слушнав за тоа. Никогаш нема да бидам добар доктор, да се соочиме со тоа. Доволно слушнав - не сакав да гледам, не сакав да го паметам Чарли на тој начин.“
Трамп посочи дека политичката организација на Чарли Кирк, Turning Point USA, ќе продолжи да работи на мобилизирање и активирање на младите гласачи и покрај смртта на Кирк.
© Vecer.mk, правата за текстот се на редакцијата
