Генералниот секретар на НАТО, Марк Руте, денес на самитот Букурештанска Деветка (Б9) во главниот град на Романија изјави дека Русија е сè уште главна закана за НАТО и ги повика сојузниците да продолжат со зајакнување на одбраната, особено на источното крило на Алијансата.
Тој рече дека НАТО поминува низ промени што би значеле дека европските членки преземаат поголема одговорност.
„Русија останува директна закана за НАТО. Мораме да направиме сè за да ги заштитиме членовите, а посилна Украина денес значи побезбедна Европа утре“, нагласи генералниот секретар на НАТО, додавајќи дека Украина мора да има доволно ресурси за да остане во борбата, објави романскиот портал Digi24.
Тој изјави дека лидерите на НАТО во Париз веќе разговарале за можната рамка на мировниот договор и оцениле дека „90 до 95 проценти“ од можниот текст е веќе договорен, додека одлуката за евентуално прекин на огнот е на Украина.
Во врска со понатамошните чекори во врска со можниот мировен процес, Руте рече дека одговорноста сега е на Москва и дека Русија мора да покаже подготвеност за следните чекори.
„Топката е во дворот на Путин“
„Засега, топката е во дворот на Путин. Тој мора да го направи следниот потег“, рече генералниот секретар на НАТО.
Зборувајќи за НАТО, Руте изјави дека Алијансата е во процес на трансформација во услови на глобални тензии и дека концептот „НАТО 3.0“ подразбира посилен сојуз со поголема европска одговорност.
Руте објасни дека „НАТО 3.0“ значи посилен НАТО во соработка со Соединетите Американски Држави, и во нуклеарна и во конвенционална смисла, со поголем придонес од европските сојузници.
„Се согласивме да одиме кон одбранбени алокации од 5 проценти од БДП. Некои земји веќе го преминаа тој праг, други се приближуваат кон него, но мора да бидеме искрени дека постојат и наши внатрешни дискусии во рамките на НАТО“, рече Руте, пренесува романскиот „Еуроњуз“.
Тој потврди дека во Вашингтон постојат одредени незадоволства во врска со ангажманот на сојузниците во сегашните кризи, вклучително и конфликтот со Иран, но оцени дека пораките на САД биле јасно разбрани меѓу членовите.
„Забележуваме значително зголемување на исполнувањето на обврските. Ова може да се види и во Романија, каде што вчера видовме како американските авиони се полнат со гориво“, рече Руте.
Зборувајќи за безбедноста на поморскиот сообраќај и на Блискиот Исток, Руте изјави дека во областа на Ормутскиот теснец се спроведуваат меѓународни операции, вклучувајќи ги и француско-британските иницијативи за расчистување на мини.
Руте повтори дека „нема НАТО без Соединетите Американски Држави“ и ја нагласи важноста на трансатлантските односи, но и на зајакнувањето на европските капацитети.
Порано денес, лидерите собрани на самитот Б9 усвоија заедничка декларација во која оценија дека Русија останува најзначајната и долгорочна безбедносна закана за НАТО, со порака за потребата од зајакнување на одбраната на источното крило на Алијансата и продолжување на поддршката за Украина.
Меѓу учесниците на самитот во Букурешт беа генералниот секретар на НАТО, Марк Руте, како и претседателите на Романија, Полска, Литванија, Естонија, Чешка, Латвија, Словачка, Финска и Данска. Учествуваа и високи претставници на САД, Шведска, Норвешка, Исланд и Унгарија. На самитот присуствуваше и украинскиот претседател Володимир Зеленски.
© Vecer.mk, правата за текстот се на редакцијата
