Американскиот претседател Доналд Трамп објави снимка од екранот од пораката што ја добил од шефот на НАТО, Марк Руте, на социјалната мрежа Truth Social. Претставници на НАТО потврдија за Ројтерс дека Руте му испратил порака на Трамп порано денес.
„Господине претседателе, драг Доналд, честитки и ви благодарам за вашата одлучна акција во Иран, што беше навистина извонредно и нешто што никој друг не се осмели да го направи. Тоа нè прави сите побезбедни. Вечерва во Хаг летате кон уште еден голем успех. Не беше лесно, но секој ќе ги потпише своите пет проценти“, се вели во пораката.
„Доналд, нè доведовте до навистина, навистина важен момент за Америка и Европа и за светот. Ќе постигнете нешто што НИЕДЕН американски претседател не можел да го постигне со децении. Европа ќе плати ГОЛЕМА цена, како што мора, и тоа ќе биде ваша победа. Среќно патување и се гледаме на вечерата на Неговото Височество! Марк Руте“, се вели во пораката.
Македонија на самитот ја претставуваат Силјановска Давкова, Муцунски и Мисајловски
Лидерите на 32 членки на НАТО денес и утре учествуваат на историски самит во Хаг, каде што се очекува да го потврдат зголемувањето на трошоците за одбрана на пет проценти од БДП до 2035 година.
Македонија ја претставува претседателката Гордана Силјановска Давкова, а во делегацијата се и министрите за надворешни работи и одбрана Тимчо Муцунски и Владо Мисајловски.
Вечерва, кралот Вилем Александар и кралицата Максима од Холандија организираат вечера за шефовите на држави и нивните партнери во Кралската палата.
Во исто време, министрите за надворешни работи на членките на НАТО и Украина ќе се сретнат на работна вечера во рамките на Советот НАТО-Украина.
Во исто време, министрите за одбрана на членките на НАТО ќе имаат и работна вечера.
© Vecer.mk, правата за текстот се на редакцијата
