Европската Унија поради „премногу идеолошки обоена политика во Брисел“ го изгуби своето влијание во светот и ѝ е потребна нова енергија, која може да ја донесат земјите од Западен Балкан, изјави синоќа унгарскиот министер за надворешни работи Петер Сијарто.
Говорејќи на форум посветен на Балканот, Сијарто оцени дека регионот може да внесе нова динамика во Европската Унија.
Осврнувајќи се на енергетиката, тој им се заблагодари на Србија, Бугарија и Турција за, како што рече, сигурната транзитна соработка во снабдувањето со природен гас.
Сијарто истакна дека Европа мора да обезбеди дополнителни количини енергенси.
– За Европа да има доволно енергенси, руските испораки мора да се вратат на европскиот пазар – рече тој.
Говорејќи за иднината на ЕУ, Сијарто нагласи дека Унгарија поддржува интеграција заснована на суверени национални држави, а не создавање „Соединети Европски Држави“.
Тој предупреди дека укинувањето на правото на вето би значело откажување од дел од националниот суверенитет.
© Vecer.mk, правата за текстот се на редакцијата
