Конфликтот меѓу САД и Иран околу контролата на Ормускиот Теснец влегува во крајно опасна и неконтролирана фаза. Додека Персискиот Залив е под силен оган, американскиот претседател Доналд Трамп најавува удари со размери кои можат целосно да ја променат рамнотежата на силите на Блискиот Исток.
Огнен бран низ Блискиот Исток: Трета ноќ по ред детонираат бомби
Американската војска, преку својата Централна команда (CENTCOM), потврди дека трета последователна ноќ извршила жестоки воздушни напади врз ирански стратешки цели. Силни детонации одекнувале долж целиот јужен брег на Иран – од туристичкиот остров Киш, па сè до пристанишниот град Бушер и воената база во Бандар Абас.
Иран веднаш премина во брутална офанзива:
- Нападнати сојузници: Бахреин беше цел на ирански ракети и дронови. Во земјата завиваа сирените за воздушна опасност, додека Техеран тврди дека погодил американски воени објекти и сателитски центри.
- Уништени супертанкери: Исламската револуционерна гарда презеде одговорност за нападот врз два супертанкери на ОАЕ во Ормускиот Теснец. Во нападот загина еден член на екипажот, а бродовите се целосно онеспособени бидејќи „илегално пловеле под диктат на САД“.
- Удар врз Јордан: Јорданските сили пресретнаа четири ирански ракети кои летаа над нивна територија.
„Американската војска вечерва и утре ќе удри уште посилно. Иран не може да направи ништо за да го спречи тоа“, порача Доналд Трамп во драматично радио интервју.
На нишан е „Пикакс Маунтин“: Дали Трамп ќе ја нападне нуклеарната програма?
Најголемата закана од Вашингтон се однесува на нападот врз фамозниот подземен објект „Пикакс Маунтин“ (Picaxe Mountain), сместен длабоко под карпите во близина на нуклеарниот комплекс Натанц. Светот стравува дека таму Иран веќе го збогатува ураниумот за својата прва атомска бомба. Трамп отворено најави дека оваа подземна тврдина е „можна цел на голем, силен напад што ќе се случи релативно наскоро“.
Воена „патарина“ за Ормус: Трамп бара 20% од светската трговија
Откако најави дека САД физички ќе го „преземат“ Ормускиот Теснец за да ја осигураат пловидбата, Трамп шокираше со предлогот за воведување давачка (данок) од 20 проценти за сите стоки и нафта што минуваат низ овој воден пат.
Одговорот од Техеран стигна со брутална иронија. Иранскиот министер за надворешни работи, Абас Арагчи, порача дека САД немаат никаква иднина во овој теснец и дека Иран засекогаш ќе остане негов чувар. На предлогот на Трамп за данокот, тој кратко и цинично искоментира на социјалната мрежа X:
„20 проценти се, секако, премногу. Ние ќе бидеме фер.“
© Vecer.mk, правата за текстот се на редакцијата
