Јужнокорејскиот претседател Ли Џе-мјунг денес положи заклетва, ветувајќи дека ќе ја обедини поделената нација, ќе ја оживее економијата и ќе води дипломатија врз основа на националните интереси.
Ли го започна својот петгодишен мандат без преоден период порано во текот на денот, победувајќи на предвремените избори по импичментот на поранешниот претседател Џун Сук-јол поради неговиот неуспешен обид за воведување воена состојба во декември, објави Јонхап.
„Без оглед на тоа кого поддржавте на овие избори, јас ќе служам како претседател на сите“, рече Ли во својот инаугуративен говор за време на церемонијата одржана во Националното собрание.
Ли го победи конзервативниот предизвикувач Ким Мун-сун. 61-годишниот поранешен адвокат ги нарече изборите „суден ден“ за воведувањето воена состојба од страна на Џун и неговата Партија на народната моќ, која не го спречи во тоа.
Ли вети дека ќе ја обедини „длабоко поделената земја“ поради воената состојба и доцниот импичмент на поранешниот претседател.
„Време е да се врати безбедноста и мирот, кои се сведени на алатки на политички конфликт, да се вратат изворите на егзистенција и економијата оштетени од рамнодушност, некомпетентност и неодговорност, и да се оживее демократијата поткопана од оклопни возила и автоматски пушки“, рече тој.
Во однос на економијата, Ли вети дека ќе усвои „прагматичен и пазарно ориентиран“ пристап за оживување на растот и негување на напредни технологии како што е вештачката интелигенција.
„Ќе создадам влада која поддржува и охрабрува, а не таква која контролира и управува“, рече Ли.
Што се однесува до надворешната политика, тој ја нагласи важноста на водењето „прагматична“ дипломатија фокусирана на националните интереси.
„Ќе ја зајакнеме соработката меѓу Јужна Кореја, САД и Јапонија врз основа на солиден сојуз меѓу Кореја и САД и ќе пристапиме кон односите со соседните земји од перспектива на практичност и национален интерес“, рече тој.
Тој, исто така, ја нагласи потребата од силно одвраќање од заканите на Северна Кореја и ја остави „вратата отворена“ за континуиран дијалог со Северот.
„Ќе отвориме канали за комуникација и ќе продолжиме со дијалог и соработка со Северот со цел да изградиме траен мир на Корејскиот Полуостров“, додаде тој.
„Церемонијата на именување“ е закажана за 17 јули
На свеченоста присуствуваа шефовите на трите гранки на владата, членови на кабинетот и пратеници, а не беа поканети странски претставници.
Пред настанот, Ли им оддаде почит на паднатите припадници на војската на Националните гробишта во Сеул.
Официјалната церемонија на инаугурација ќе се одржи на 17 јули, кога ќе се прослави и Денот на Уставот, објави кабинетот на претседателот.
Настанот ќе се вика „Церемонија на именување“, беше објавено.
Одржувањето на церемонијата на Денот на Уставот ја нагласува неговата посветеност на „цврсто одржување на уставниот поредок“.
Ли освои 49,4 проценти од гласовите на претседателските избори, според резултатите на Централната изборна комисија врз основа на 100 проценти од преброените гласови.
Кандидатот на владејачката конзервативна Партија на народната моќ, Ким Мун Су, освои 41,1 процент од гласовите.
Излезноста на гласачите била 79,4 проценти, што е највисока во последните 28 години, објави Јонхап.
© Vecer.mk, правата за текстот се на редакцијата
