Речиси 40 години откако млада мајка беше претепана до смрт во својот дом, полицијата на Флорида соопшти дека еден телефонски повик ги довел до нов осомничен.
Мелиса Елисон (20) беше пронајдена мртва во својот дом во Џексонвил на Флорида на 28 декември 1987 година. Според наводите на полицијата, таа починала како последица од повеќекратни удари со тап предмет. Нејзините цимери им кажале на истражителите дека отишле да ја проверат откако во дневната соба ја затекнале нејзината мала ќерка како плаче. Иако веднаш била покрената истрага, случајот со години останал нерешен.
Еден повик го промени текот на истрагата
Пресвртот уследи во средата, кога седумдесетгодишниот Гери Гловач се јавил во дежурната служба на канцеларијата на шерифот на округот Клеј и рекол дека сака да сподели информации за убиството на Мелиса Елисон.
По повикот, Гловач бил приведен на разговор во канцеларијата на шерифот во Џексонвил, а набрзо потоа бил уапсен и сместен во затвор во округот Дувал под обвинение за убиство и провала, соопштија истражителите во четвртокот.
Полицијата не ја откри содржината на телефонскиот разговор, ниту објасни зошто веднаш по сослушувањето било одлучено тој да биде уапсен.
„Иако неговото апсење не може да ја пополни огромната празнина во срцата на најблиските на Мелиса, се надевам дека ова е уште еден чекор кон нивното исцелување. Со повикување на одговорност можеме ова грозоморно злосторство да го наречеме со вистинското име – убиство и провала со примена на насилство“, рече шерифот на Џексонвил, Т. К. Вотерс, на прес-конференција.
Тој додаде дека телевизиските серии често создаваат впечаток дека убиствата што не се решени во првите 48 часа никогаш нема да бидат расветлени.
„Тоа едноставно не е точно“, порача Вотерс.
Ќерката на жртвата: Ова ми донесе чувство дека приказната е завршена
Ќерката на Мелиса, Кејси, која во моментот на убиството имала само 13 месеци, изјави дека апсењето на осомничениот му го променило погледот на светот.
„Знам дека тоа никогаш нема да ми ја врати мама, но чувствувам неверојатно олеснување и конечно имам чувство дека една приказна е завршена“, изјави таа за локалната телевизија News4Jax.
Шерифот наведе дека случајот сега го води државното обвинителство, поради што не можеше да открие на кој начин Гловач бил идентификуван како осомничен.
„Ова апсење покажува дека оваа служба никогаш не се откажува и дека останува посветена на тоа правдата да ги стигне жртвите и нивните семејства“, рече Вотерс.
Според наводите на News4Jax, Гловач има богато криминално досие. Тој бил осудуван во 1989 и 1996 година за купување кокаин, во 1998 година за провала, а пред десетина години признал вина за возење под дејство на алкохол во округот Клеј.
Според затворската евиденција, тој треба да се појави пред судот на 30 јули. Засега не е познато дали ангажирал адвокат кој ќе го застапува.
© Vecer.mk, правата за текстот се на редакцијата
