Во телефонски разговор оваа недела со американскиот претседател Доналд Трамп, рускиот претседател Владимир Путин побара Киев да ја предаде целосната контрола врз Донецк, стратешки важен регион во источна Украина, како услов за завршување на војната.
Путин не успеа целосно да ја освои оваа територија веќе 11 години, а украинските сили постојано ги одбиваат руските напади, па затоа се верува дека областа е голема пречка за брзото напредување на руската војска кон запад.
Фокусот на Путин на Донецк сугерира дека тој не се откажал од неговите претходни барања што ги закочија разговорите за конфликтот, и покрај оптимизмот на Трамп за постигнување мировен договор, рекоа неименуваните функционери.
Трамп јавно не го коментираше барањето на Путин за предавање на целата територија на Донецк.
Рускиот лидер во разговорот со Трамп посочи дека би бил подготвен да предаде делови од другите два региони на Украина што делумно ги освои, имено Запорожје и Херсон, во замена за целосна контрола врз Донецк, додадоа функционерите, пишува „Вашингтон пост“, повикувајќи се на двајца високи функционери запознаени со разговорот.
Американскиот претседател планира да се сретне со шефот на руската држава во Будимпешта во наредните недели.
© Vecer.mk, правата за текстот се на редакцијата
