Најбараниот бегалец во Еквадор, Хозе Адолфо Масијас, познат и како Фито, е повторно фатен повеќе од една година откако избега од затвор со максимална безбедност.
Фито, водач на озлогласената банда Лос Чонерос, беше пронајден во неговиот роден град Манта, по десетчасовна операција на безбедносните сили. Видео објавено од еквадорската војска покажува униформиран војник како му насочува пиштол во главата откако бил пронајден скриен во мала дупка под кујнскиот шанк.
Масијас има богато криминално досие, вклучувајќи обвиненија за убиства и организиран криминал, а беше осуден на 34 години затвор во 2011 година.
Понудија награда од милион долари
За негово апсење беше понудена награда од еден милион долари. Властите сè уште не објасниле како избегал - неговото исчезнување било откриено дури кога војската дошла да го земе за префрлање во друг затвор и пронашла празна ќелија.
По бегството, беше прогласена вонредна состојба во траење од 60 дена. Во овој период, маскирани вооружени лица упаднаа во телевизиско студио за време на пренос во живо и тврдеа дека имаат бомби.
Интерпол брзо издаде меѓународна потерница по Масијас, кој треба да се соочи со судење во Њујорк за меѓународна трговија со дрога и оружје.
Масијас е обвинет за дистрибуција на кокаин низ целиот свет и шверц на оружје и муниција од САД во Еквадор, во соработка со мексикански картели.
Еквадорскиот претседател Даниел Нобоа потврди дека неговата влада веќе побарала екстрадиција на Масијас во САД и најави дека „ќе паднат повеќе познати водачи на банди“.
Култен статус
Масијас, кој имаше речиси култен статус меѓу дел од јавноста, беше познат по организирање забави со алкохол и борби со петли во затвор. Во 2023 година, тој објави видео обраќање до луѓето од затвор, опкружен со вооружени чувари.
Минатата година, САД ги прогласија Лос Чонерос за една од најнасилните банди во светот, додека Еквадор ја означи групата како терористичка организација.
Неговото апсење доаѓа неколку недели откако владата објави дека ќе ја зголеми наградата за негово апсење на 1 милион долари.
© Vecer.mk, правата за текстот се на редакцијата
