Талибанските власти во Авганистан денес извршија јавна егзекуција на маж обвинет за убиство на 13 членови на семејство на стадион во источниот град Хост, а повеќе од 80.000 луѓе, вклучувајќи роднини на жртвите, беа сведоци на егзекуцијата.
Обвинетиот беше идентификуван како „Мангала, син на Тал Кан“, жител на Хост, и беше уапсен за убиството на „Абдул Рахман, син на Забид“, објави АП.
Врховниот суд на Талибанците изјави дека смртната казна ја потврдил лидерот на Талибанците, Хаибатула Ахунџада, откако претходно била разгледана од три суда.
Талибанците изјавија дека побарале од семејството на жртвата „прошка и мир“ со обвинетиот, но семејството го одбило нивното барање.
Двајца други осудени на смрт во истиот случај сè уште не се егзекутирани поради „отсуство на наследниците на починатиот“, а талибанските претставници велат дека кога ќе бидат присутни, и тие ќе бидат егзекутирани.
Обединетите нации и меѓународните организации постојано ги повикуваат Талибанците да ја суспендираат смртната казна и јавните егзекуции, но Талибанците ги игнорираат овие повици, тврдејќи дека го спроведуваат исламскиот закон.
Групите за човекови права истакнуваат дека правосудниот систем на Талибанците не ги следи стандардните процедури, вклучително и правото на адвокат, и дека Талибанците редовно практикуваат јавно камшикување.
Паметните телефони се забранети за време на егзекуциите, а граѓаните се охрабруваат да ги гледаат егзекуциите и камшикувањата, што критичарите ги нарекуваат „психолошка тортура“ и средство за заплашување на населението.
© Vecer.mk, правата за текстот се на редакцијата
