Германија би можела да размисли за повторно воведување на задолжителна воена служба уште следната година доколку не успее да привлече доволно волонтери за своите вооружени сили, изјави германскиот министер за одбрана Борис Писториус.
Писториус за „Франкфуртер алгемајне зонтагцајтунг“ изјави дека моделот на воена служба во Германија „се заснова на доброволно учество“, но дека може да се замени со задолжително учество доколку не се пријават доволен број волонтери, објави Ројтерс.
„Ако дојде време кога ќе имаме повеќе расположлив капацитет од доброволни регистрации (за воена служба), тогаш може да одлучиме да го направиме задолжително“, истакна Писториус.
Според него, новиот закон за оваа мерка би можел да стапи во сила веќе од 1 јануари 2026 година. Регрутацијата, или задолжителната воена служба, денес ја поддржа и командантот на германската дивизија за национална безбедност, Андреас Хене.
„Бевме на вистинскиот пат, но сега треба да го забрзаме темпото. Во однос на опремата, проширувањето на инфраструктурата и, пред сè, персоналот“, рече Хене во интервју за новинската веб-страница Т-онлајн. Како што претходно објави Бундесверот, на германските вооружени сили им се потребни дополнителни 100.000 војници во наредните години за да ги исполнат своите обврски кон НАТО.
Христијанските демократи (CDU), кои предводат коалиција во која социјалдемократите (SPD) на Писториус се помлад партнер, ги зголемија воените трошоци и сигнализираа отвореност за воведување задолжителна воена служба, која беше укината во 2011 година.
© Vecer.mk, правата за текстот се на редакцијата
