Министерството за одбрана на САД воведе нови ограничувања за новинарите што известуваат за Пентагон, наредувајќи им ниту да собираат ниту да користат информации за кои немаат официјално одобрение за објавување, во спротивно нивните акредитиви за известување ќе бидат одземени.
Во меморандум од 17 страници испратен од Пентагон до медиумите се наведува дека сите информации за објавување мора да бидат одобрени од овластено службено лице, дури и ако не се класифицирани, објавија американските медиуми во саботата.
Новинарите ќе мора писмено да се обврзат дека нема да објавуваат никакви претходно неодобрени информации.
Ова ефикасно го забранува објавувањето на материјали што потекнуваат од неименувани функционери, пишува агенцијата АФП.
Ограничено движење околу зградата
На новинарите им е ограничено и движењето во Пентагон, а големи делови од зградата се прогласени за недостапни за пристап без придружба.
Иако пристапот до многу канцеларии и сали за состаноци во Пентагон претходно беше ограничен, новинарите досега имаа пристап без придружба до поголемиот дел од зградата и нејзините ходници.
Во Пентагон, околу деведесет новинари моментално се акредитирани да известуваат за војската.
Реакции на ограничувањата
Американските медиуми проценуваат дека овој потег би можел драстично да го ограничи протокот на информации за американската војска.
Националниот прес-клуб, национално здружение на новинари, ја нарече одлуката „директен напад врз независното новинарство“, рече тој, и побара нејзино итно укинување.
Ова е најновата мерка на администрацијата на претседателот Доналд Трамп за контрола на медиумското известување. Упатствата следат по острите критики на Трамп за известувањето на американските медиуми за него и неговата администрација, за кое тој смета дека е премногу негативно.
© Vecer.mk, правата за текстот се на редакцијата
