Безбедносната служба на Украина (СБУ) објави видео на кое се гледа едно од возилата опремени со дронови FPV како се упатува на мисија за време на операцијата „Пајажина“, масовен напад врз руските воени бази на 1 јуни.
Во нападот учествувале повеќе од 100 украински дронови кои ги таргетирале стратешките воздушни бази длабоко на руска територија, со цел да се онеспособат бомбардерите со долг дострел способни да носат нуклеарно оружје.
Размерот на операцијата стана очигледен речиси веднаш, со пријавени експлозии во повеќе временски зони, од Мурманск на крајниот север, над Арктичкиот круг, до регионот Амур на крајниот исток, на повеќе од 8.000 километри од украинската граница.
Руското Министерство за одбрана потврди дека нападите се извршени во најмалку пет региони - Мурманск, Иркутск, Иваново, Рјазан и Амур. Според нивните изјави, штети на авиони се регистрирани во Мурманск и Иркутск, додека нападите на други локации наводно биле одбиени.
Русија објави дека привела луѓе поврзани со нападот, иако Зеленски рече дека луѓето кои помогнале во спроведувањето на операцијата „биле повлечени од руска територија и сега се безбедни“.
Операцијата „Пајажина“ се смета за еден од најсложените и најдалекусежни украински напади врз руската воена инфраструктура од почетокот на војната.
© Vecer.mk, правата за текстот се на редакцијата
