Северна Кореја планира да испрати околу 5.000 воени градежници и 1.000 деминери во регионот Курск на Русија, информираше рускиот министер за одбрана Сергеј Шојгу по средбата со севернокорејскиот лидер Ким Џонг-ун. Овие тимови треба да помогнат во реконструкцијата на областите погодени од украински напади.
Севернокорејската државна телевизија информира дека во земјата ќе се организираат свечености за да се чествуваат, како што наведуваат, „херојските достигнувања“ на нивните војници кои ќе ги извршуваат задачите во Русија.
Реакцијата на Јужна Кореја беше остра, бидејќи од Сеул тврдат дека ваквиот потег е неприфатлив и претставува директно прекршување на санкциите на Обединетите Нации. Јужнокорејската влада побара моментално запирање на соработката меѓу Пјонгјанг и Москва.
За време на самитот на Г7 во Италија, Јапонија и Јужна Кореја ја искажаа својата загриженост дека Северна Кореја би можела да добива воена технологија и економска помош од Русија. Ројтерс извести дека Пјонгјанг веќе испратил муниција и персонал во поддршка на руските операции во Украина.
© Vecer.mk, правата за текстот се на редакцијата
