Реј Далио, 76-годишниот милијардер и основач на инвестицискиот фонд „Бриџвотер Асошиејтс“, предупредува на економската криза во САД и другите западни земји.
Тој го основал својот фонд пред 50 години, сведок на бројни кризи, а сега ги споделува своите теории во новата книга „Како државите банкротираат“.
Во интервју за „Фајненшл тајмс“, тој ја критикуваше економската политика, вклучително и потезите на Доналд Трамп, предупредувајќи на глобални економски превирања, објавува „Ноје Цирхер Цајтунг“.
Далио верува дека земјите стануваат презадолжени како што расте богатството, што доведува до нивно пропаѓање, слично на историските примери од 1930-тите и 1970-тите.
Задолжувањето е корисно ако генерира доволно приходи за отплата, но САД, на пример, трошат трилион долари годишно за отплата на долг од вкупно пет трилиони приходи, што укажува на неодржливост.
Велика Британија, Франција и Јапонија се соочуваат со уште полоши проблеми, а Далио предупредува дека економските тешкотии би можеле да кулминираат во рок од три години, предизвикувајќи „срцев удар“ врз економиите.
Приносите на 30-годишните обврзници растат на глобално ниво, што дополнително ја зголемува вознемиреноста на инвеститорите.
Далио, исто така, истакнува дека владите во време на криза честопати прибегнуваат кон популистички мерки, без разлика дали од левата или од десната страна, што може да ја загрози демократијата. Неговите предупредувања особено резонираа со неодамнешните превирања на пазарот на обврзници, сигнализирајќи за можен глобален економски колапс.
© Vecer.mk, правата за текстот се на редакцијата
