Вашингтон ги предупреди европските сојузници, вклучувајќи ги Велика Британија, Полска, Литванија и Естонија, дека пратките на американско оружје ќе бидат одложени. Пентагон ги информираше партнерските влади за ова, а причината е едноставна - во војната со Иран беа потрошени огромни количини оружје и сега нема доволно.
Американската војска беше принудена да преместува оружје од други делови на светот, вклучително и Азија, за да ги пополни празнините во снабдувањето. Постои поголем проблем од самото одложување, а тоа е што војната со Иран ги зголеми веќе растечките стравувања за тоа дали САД имаат доволно оружје за да се соочат со Кина во случај на конфликт околу Тајван.
Одложувањата ќе влијаат на муницијата за системите HIMARS и NASAMS. HIMARS се високо мобилни ракетни системи што ги користи и Украина, а NASAMS се противвоздушни ракетни системи со среден до краток дострел, заеднички произведени од Raytheon и норвешкиот Kongsberg.
Трамп ги отфрли загриженостите за залихите
Пентагон потврди дека „внимателно ги оценува барањата на партнерите за опрема“, но не даде детали.
Доналд Трамп, од друга страна, ги отфрли сите загрижености за залихите.
„Имаме оружје низ целиот свет и можеме да го земеме ако ни треба“, рече претседателот. Експертите не се согласуваат со него, пишува Фајненшл тајмс.
Том Рајт, поранешен функционер на администрацијата на Бајден, кој сега работи во Институтот Брукингс, беше јасен:
„Пентагон сега мора да води долга војна на Блискиот Исток, а во исто време да се обиде да ја спречи Кина да се движи кон Тајван. Тој е сосема подготвен да ја остави Европа на цедило. Европа мора да изгради своја воена индустрија што е можно побрзо.“
Одложувањата нема да влијаат само на Европа. Експертите предупредуваат дека сојузниците во Азија, Јапонија и Јужна Кореја, може да се соочат со истиот проблем со испораките на оружје.
Кристофер Џонстон, поранешен висок функционер на Пентагон, вели дека азиските сојузници „веројатно не сфаќаат колку недостигот на оружје во Америка ќе влијае врз нив и колку долго ќе трае таа ситуација“.
Јапонија веќе беше незадоволна од одложувањата во испораката на оружјето за кое плати, вклучувајќи ги и крстосувачките ракети Томахавк.
„Таа реалност ќе ги принуди Јапонија, Јужна Кореја и другите сојузници сè повеќе да бараат свои и неамерикански опции, дури и таму каде што американското оружје е очигледно супериорно“, рече Џонстон.
Особено интересен е Тајван, за кој САД наводно подготвуваат најголем пакет за продажба на оружје досега, кој вклучува противвоздушни системи NASAMS и Patriot. Вредноста само на делот со NASAMS се проценува на околу шест милијарди долари.
Украина доби лоши вести уште порано. Висок украински функционер потврди дека испораките на оружје од САД се одложуваат од почетокот на војната со Иран. Претседателот Зеленски предупреди дека поради ова, противвоздушните ракетни системи Patriot понекогаш остануваат празни во средината на руските напади.
Производството не може брзо да се зголеми
Адмиралот Самуел Папаро, командант на американскиот Пацифик, минатиот месец изјави дека ќе бидат потребни до две години за големите одбранбени компании да го зголемат производството доволно за да ги надополнат залихите. Трамп објави дека компаниите се согласиле да го „зголемат четирикратно“ производството на најсложените оружја, но испораките се мерат со години и нема брзо решение.
Трамп јавно ги нападна сојузниците за недоволен придонес во американската кампања против Иран, а неколку медиумски интервјуа нагласија дека одложувањата не се намерна казна за Европа, туку доказ за сериозна загриженост во врска со американските испораки.
© Vecer.mk, правата за текстот се на редакцијата
