Владата на Нигер објави планови за национализација на рудникот за ураниум Сомаир, управуван од француската компанија за нуклеарно гориво „Орано“, се вели во соопштението прочитано на националната телевизија во земјата.
Во соопштението на владата на таа западноафриканска земја се наведуваат голем број причини за таквата одлука, вклучувајќи го и истекот на последниот договор за рударство со таа компанија, од декември 2023 година, пренесува Ројтерс.
„Соочена со ова неодговорно, незаконско и неправедно однесување на Орано, компанија во сопственост на француската држава - држава која отворено е непријателски настроена кон Нигер од 26 јули 2023 година... владата на Нигер одлучи, со целосен суверенитет, да го национализира Сомаир“, се вели во соопштението.
Одлуката претставува ескалација на спорот меѓу владата и француската компанија, по влошувањето на односите меѓу Франција и Нигер што се случи по воениот удар во јули 2023 година.
„Орано“ поседува 63 проценти од акциите во „Сомаир“, додека државната компанија „Сопамин“ на Нигер го поседува остатокот од компанијата, но францускиот оператор е исклучен откако владата предводена од војската ја презеде контролата врз рудникот за ураниум.
Орано, кој ја водеше арбитражата против Нигер и поднесе тужби во земјата против постапките на државата, предупреди за мешање на владата во Сомаир, кое, според него, ѝ штети на финансиската состојба на рудникот.
© Vecer.mk, правата за текстот се на редакцијата
