Имам намера да станам претседател на Украина, му порача Валериј Залужни, поранешен врховен командант и сегашен украински амбасадор во Обединетото Кралство, на актуелниот претседател Володимир Зеленски. Залужни минатата недела беше повикан во Киев поради оставката на британскиот премиер Кир Стармер, па претседателот Зеленски и тој го поминаа првиот дел од нивниот состанок во четири очи разговарајќи за ситуацијата во Лондон и нејзините можни импликации врз украинско-британските односи.
Но, како што дознава дневниот портал „Украинска правда“ од неколку учесници, по тоа претседателот се фокусирал на темата за претседателските избори. Зеленски рекол дека ситуацијата на фронтот во последно време се развива позитивно, состојбата во Украина е стабилна и се појавила можност за одржување на претседателски избори. Сепак, главната задача е тие да се одржат така што Украина нема да доживее нов внатрешен раскол, поради што е потребно да се избегнат ризиците што би ги предизвикал судирот меѓу Зеленски и Залужни, раскажаа изворите на „Украинска правда“. На крајот од состанокот, Зеленски му поставил директно прашање на поранешниот врховен командант дали ќе се кандидира доколку изборите се одржат наесен. На тоа следувал недвосмислен одговор од Залужни кој потврдил дека ќе го стори тоа. Залужни додал дека никогаш не тежнеел кон политичка кариера, но многу луѓе полагале надежи во него, па тој нема да може да им објасни зошто би го занемарил нивното доверие.
Залужни во Киев се сретна и со секретарот на Советот за национална безбедност и одбрана, Рустем Умеров, како и со шефот на пратеничката група „Слуга на народот“, Давид Арахамија. Тие ги повторија речиси истите аргументи како и Зеленски, предупредувајќи на можен општествен раскол, опасност од премногу конфликтна кампања и ризици за државата, но Залужни не го промени своето мислење.
Најновото истражување на Киевскиот меѓународен институт за социологија откри дека бројот на Украинци кои сакаат промена на претседателот пораснал на дури 67 проценти. Генералот го знае тоа и сега ги отвори картите. Валериј Залужни во декември 2025 година на Фејсбук објави фотографија со сопругата Олена и напиша „Дома е најдобро“, што беше протолкувано како најава за влез во украинската политика. Нешто порано беше објавено социолошко истражување кое потврди дека тоа тој на претседателските избори би освоил 41,4 отсто од гласовите, додека Зеленски би добил 27 отсто. Истражувањата покажаа дека 74 проценти од испитаниците му веруваат на поранешниот врховен командант, додека 68 проценти му веруваат на претседателот, а во меѓувреме рејтингот на Зеленски дополнително беше нагризан од корупциска афера во која се вмешани неговите соработници.
И американскиот претседател Доналд Трамп кон крајот на минатата година порача дека Украина треба да одржи избори, вршејќи на тој начин дополнителен притисок врз Володимир Зеленски да го прифати мировниот договор меѓу Русија и Украина. Зеленски тогаш одговори дека е подготвен за претседателски избори доколку меѓународните партнери можат да ја осигураат безбедноста, како и за измени на законодавството за избори за време на вонредна состојба, бидејќи Уставот на Украина не дозволува парламентарни избори во воени околности. Поради тоа не беа одржани изборите за Врховната рада кои беа закажани за октомври 2023 година и претседателските избори закажани за март 2024 година, а тоа го искористија руската влада и руската пропаганда промовирајќи ја тезата за нелегитимноста на Зеленски.
Зеленски пред три години го смени Залужни и го испрати во Лондон. Генералот го прифати тоа и во меѓувреме избегнуваше да ги коментира политичките прилики во Украина, но на сè еднаш му доаѓа крај. Иако трае војната, претседателските избори можат да се одржат и за време на вонредна состојба. За да се случи тоа, потребна е поддршка од парламентот, што речиси сигурно ќе биде поддржано и од пратениците кои го поддржуваат Зеленски, а особено од оние кои го прижелкуваат неговиот пад.
Неодамна Залужни објави колумна во која ја поддржа идејата за склучување мир без целосна победа над Русија, со објаснување дека војната не завршува секогаш со победа на едната страна и пораз на другата. Тој напиша дека тоа се случило во Втората светска војна, но дека тоа е ретка исклучок бидејќи речиси никогаш не се случило во човечката историја, додека огромното мнозинство војни завршуваат така што секоја страна е убедена дека победила, или со некои поинакви сценарија.
© Vecer.mk, правата за текстот се на редакцијата
