Германија мора да ја подобри својата одбрана од беспилотни летала, изјави германскиот министер за одбрана Борис Писториус, но предупреди на опасноста од пребрзо реагирање на упадите на беспилотни летала во германскиот воздушен простор, бидејќи тоа би значело паѓање во „стапицата за ескалација на Путин“.
„Не смееме да паднеме во стапицата за ескалација на Путин. Да го соборевме авионот, тој ќе тврдеше дека тоа е грешка на пилотот и дека соборивме невин млад човек“, истакна Писториус во интервју за весникот Ханделсблат.
Тој нагласи дека Германија мора да ги разгледа сите релевантни закани, а не само нападите со беспилотни летала, за да ги поврзе навидум неповрзаните настани, објави Ројтерс.
„На пример, кога истовремено ќе избувнат неколку шумски пожари или прекини на електричната енергија во различни региони. Сите релевантни податоци за проценка на безбедносната состојба во Германија мора да се соберат на едно место“, рече германскиот министер Писториус. Тој изјави дека Германија треба да го следи примерот на Франција и да преземе поактивна државна контрола врз важните одбранбени компании.
„Компаниите со клучни технологии мора да се зачуваат“, рече тој, додавајќи дека државата е неопходна за зачувување на знаењето и работните места во Германија.
Министерот, исто така, предупреди дека Германија ќе се откаже од заедничкиот француско-германско-шпански проект за борбени авиони FCAS доколку нема јасна обврска од сите три земји.
„Ќе разговарам со моите колеги штом Франција формира влада. Канцеларот и јас се согласуваме дека одлуката мора да се донесе до крајот на годината. Во спротивно, ќе ја повлечеме поддршката“, истакна Писториус.
Писториус зборуваше за весникот „Ханделсблат“ откако беспилотните летала предизвикаа откажување на десетици летови на аеродромот во Минхен во саботата, оставајќи повеќе од 10.000 патници блокирани.
Иако властите сè уште не ја обвинија Русија, официјалните лица велат дека Москва е одговорна за серијата неодамнешни упади и појавувања на беспилотни летала во воздушниот простор на Украина и нејзините европски сојузници.
© Vecer.mk, правата за текстот се на редакцијата
