Советот за безбедност на ОН утре наутро ќе гласа за нацрт-резолуцијата предложена од Бахреин, со која се бара овластување за користење „сите потребни одбранбени средства“ за обезбедување на слободниот премин низ Ормускиот теснец. Иако гласањето првично беше планирано за петок, дипломатски извори за „Ројтерс“ потврдија дека е одложено за еден ден.
Дипломатска офанзива на Ријад
Клучна улога во процесот игра Саудиска Арабија. Престолонаследникот Мохамед бин Салман веќе разговарал со рускиот претседател Владимир Путин, при што се очекува Русија да не ја блокира резолуцијата. Слични очекувања има и за Кина, иако кинескиот претставник во ОН, Фу Конг, изрази сериозна резервираност, предупредувајќи дека одобрувањето сила може да доведе до „незаконска и неселективна употреба на моќ“ и дополнителна ескалација.
Што предвидува резолуцијата?
Нацрт-документот, до кој дојде „Си-Ен-Ен“, директно ги осудува постапките на Иран како кршење на меѓународното право. Главните точки вклучуваат:
Овластување за воена акција: Земјите-членки (самостојно или во партнерства) ќе можат да користат одбранбени мерки во теснецот, па дури и во територијалните води на крајбрежните држави.
Овластувањето би траело шест месеци со обврска за квартално известување до СБ. Мерките се однесуваат исклучиво на Ормускиот теснец и не поставуваат нов меѓународен преседан.
© Vecer.mk, правата за текстот се на редакцијата
