Тотенхем ја продолжува резултатската криза. Во меч од 13. коло на англиската Премиер-лига, вечерва на свој терен беше поразен од градскиот ривал Фулам со 1:2 за четврти меч без победа во низа.
Ова е вкупно петти пораз за Тотенхем во 13 одиграни натпревари, додека Фулам ја забележа својата петта победа.
Почетокот беше шокантен за „петлите“ – веќе во првите шест минути двапати капитулираа.
Фулам поведе во 4. минута кога Чуквуезе проби по левата страна, имаше премногу простор и време да го пронајде Тете на работ на шеснаесетникот, кој беше прецизен за 0:1. Само две минути подоцна – нов удар. Огромна грешка на голманот Викарио, кој излета далеку надвор од својот шеснаесетник и лошо ја исфрли топката директно во нозете на противникот. Вилсон тоа го казни со удар од аут-линијата во празна мрежа – 0:2.
Одговорот на Тотенхем следеше дури во 59. минута. Кудус постигна ефектен гол со левата нога и ја врати надежта – 1:2.
Се очекуваше посилен притисок од домаќините, но одбраната на Фулам беше стабилна и ја сочува минималната предност.
