Барселона се соочува со забрана за настап во следното издание на Лига на шампиони поради кршење на финансиските правила на УЕФА втора година по ред, објави „Тајмс“. Челзи и Астон Вила исто така би можеле да се соочат со санкции, но во нивниот случај, тоа би била полесна казна, бидејќи ова е нивно прво прекршување на правилата.
Според „Тајмс“, казната со која се соочува Барса би можела да вклучува регистрација на помал состав, што значи ограничување на бројот на играчи што можат да ги регистрираат во натпреварувањето или губење на бодови во основниот дел на натпреварувањето.
Во октомври, Барселона ја загуби жалбата пред Арбитражниот суд за спорт (CAS) за казната од 500.000 евра за погрешно пријавување на профитот. CAS во тоа време изјави дека казната е лесна, но ја предупреди Барселона дека второто прекршување ќе резултира со построги санкции.
Според „Тајмс“, ова второ прекршување е пријавено, а УЕФА ќе објави детали за тимовите кои не ги почитувале финансиските правила во наредните недели.
