Вечерва од 21 часот на „Џузепе Меаца“ во Милано, се игра реванш мечот од полуфиналето во Лигата на Шампионите меѓу Интер и Барселона. По оние фантастични 3:3 во Каталонија минатата недела, неутралните фанови очекуваат нов спектакл, нова мега – пресметка. Ако по првиот меч сите бевме восхитени на таа претстава, што ли само можеме да очекуваме вечерва.
А вечерва е момент на вистината. Интер или Барса – кој ќе оди во Минхен во финалето на 31 мај.
Тоа ќе го дознаме некаде околу 23 часот или подоцна ако има продолженија и пенали.
За Интер и Иназаги главен фактор е дисциплината, играта на резултат, домашните фанови, искуството.
За Барса и Флик фактор на успехот на овој меч се Јамал, младоста и полетноста, квалитетот, знаењето како треба.
Интер нема пораз на последните 15 меча на својот стадион во Лигата на Шампионите, под прашање е настапот на капитенот Лаутаро Мартинез, сепак како што се наближува почетокот на мечот расте оптимизмот дека сепак ќе настапи.
Барселона ги има Јамал и Рафиња, Левандовски се враќа, но прашање е дали ќе биде стартер или мечот ќе го започне од клупа.
И сега едно мало потсетување. Во 2010 година, во тоа полуфинале Интер беше подобар од Барса, прво дома со 3:1 па после на гости со 0:1, за да потоа Пандев и другарите славеа во финалето со 2:0 на “Сантијаго Бернабеу“ против Баерн Минхен.
Ова е шанса за Барселона за одмазда.
Инаку Барса посакува финале по пауза од 10 години кога последен пат го освои „ушлето“ во таа 2015 со Луис Енрике на клупата и со Меси, Нејмар, Суарез во нападот.
Сепак и сега Барса има блескав тим,сака финале, го сака „ушлето“, но треба да се прескокне Интер и тоа пред 80.000 домашни фанови на “Меаца“.
Време е за спектакл, време е за нова епска пресметка.
