Зелено’ртските Острови завршија втори во својата Група Х и сензационално се пласираа во осминафиналето на Светското првенство во фудбал во 2026 година. Со ова достигнување, дебитантите на турнирот официјално станаа најмалата земја што некогаш ја поминала групната фаза во историјата на Светското првенство – феноменално достигнување за малата островска нација.
Тимот излезе од тешка група целосно непоразен, оставајќи ги зад себе двократните светски шампиони Уругвај и тимот на Саудиска Арабија.
„Сините ајкули“, кои имаат население од само 525.000 луѓе, обезбедија историска квалификација по ремито без голови против Саудиска Арабија во последното коло. Колку за споредба, Скопје на последниот попис имаше 526.000 жители.
Пред тоа, тие направија огромно изненадување во своите први два натпревари, прво држејќи ги фаворитите Шпанија на реми 0-0, а потоа играјќи драматично реми 2-2 против Уругвај. Со три бода, тие го обезбедија второто место и ќе се соочат со бранителот на светската титула Аргентина во следната нокаут рунда на 3 јули во Мајами.
Претходниот рекорд за најмала земја по население што стигнала до нокаут фазата на Светското првенство го држеше Парагвај. Кога јужноамериканската земја учествуваше на своето прво Светско првенство во 1930 година, нејзиното население броеше нешто повеќе од 860.000 жители.
Со пласманот во нокаут фазата на Зеленртски Острови овој речиси еден век стар рекорд беше подобрен со разлика од над 300.000 жители. Две други помали нации – Курасао (во 2026 година) и Исланд (во 2018 година) – исто така играа на Светските првенства, но беа елиминирани во групните фази.
