ФИФА објави дека фудбалските навивачи ќе можат да купат автентични делови од тревата од теренот каде што ќе се игра финалето на Светското првенство во 2026 година, по цена од 450 долари по парче.
Делови од теренот од стадионот „МетЛајф“ во Њу Џерси, каде што финалето е закажано за 19 јули, ќе бидат достапни како колекционерски предмети, соопшти светското управно тело на фудбалот.
„Поседувајте вистинско парче од фудбалската историја со автентично парче од теренот за финалето на Светското првенство во 2026 година“, пишува во описот на производот на официјалната онлајн продавница на ФИФА, објавува NBC News.
Секое парче трева ќе биде трајно зачувано во акрилна заштита и ќе доаѓа со USB-стик што содржи сертификат за автентичност.
ФИФА изјави дека е „уникатен колекционерски предмет за навивачи и љубители на фудбалот“.
Во понудата се наведуваат димензии од 17,5 на 17,5 на 17,5, но не е прецизирано дали мерките се изразени во сантиметри, милиметри или инчи.
Доставата ќе биде можна само до адреси во Соединетите Американски Држави и Европа, а нарачките нема да бидат испратени пред финалниот натпревар.
Трендот на стадионот „МетЛајф“, кој е дом на „Њујорк Џајантс“ и „Њујорк Џетс“ од НФЛ, претходно беше предмет на критики од играчите и тренерите поради квалитетот на подлогата.
ФИФА ги објави цените на билетите за финалето на Светското првенство во 2026 година, кои достигнуваат 32.970 долари, додека луксузните пакети со храна и пијалоци чинат до 34.500 долари.
© Vecer.mk, правата за текстот се на редакцијата
