Фудбалскиот тренер на Арсенал, Микел Артета, пред финалето на Лигата на шампионите против Пари Сен Жермен, кое се игра денеска со почеток во 18 часот, изјави дека неговиот тим има можност да напише нова страница во историјата со освојување на првата титула европски шампион.
„Подготовката беше многу добра и позитивна. Тука сме затоа што заслужуваме да бидеме. Утре ќе се обидеме да го заслужиме и овој трофеј“, рече Артета .
Шпанскиот стручњак потврди дека Тимбер ќе биде подготвен за финалето, додека Бен Вајт нема да се натпреварува за тимот. Артета истакна дека научил многу од поразите од минатата сезона против ПСЖ.
„Разговаравме за тие натпревари и еволуиравме на поинаков начин. Научивме многу“, изјави тренерот на Арсенал.
Финалето ќе донесе дуел меѓу двајца шпански тренери, бидејќи ПСЖ го предводи Луис Енрике, кого Артета го нарече една од неговите најголеми инспирации.
„Тој отсекогаш ми бил референца, дури и кога бев играч. Неговата филозофија на играта и неговиот начин на размислување се инспирација, но утре ќе бидеме ривали“, рече Артета.
Зборувајќи за важноста на натпреварот, тренерот на лондонскиот клуб нагласи дека неговите играчи имаат голема желба за успех.
„Гледам глад, желба и огромна мотивација. Ова е најголемата игра во фудбалот и сите сакаат да бидат дел од неа. Играчите ја вкусија победата и повторно ја сакаат истата“, рече Артета.
Арсенал никогаш не ја освоил Лигата на шампионите во својата 140-годишна историја.
„Знаеме колку е тешко, но тоа е она што дополнително нè мотивира. Имаме шанса да направиме историја и тоа би го променило клубот засекогаш“, рече шпанскиот тренер.
Артета додаде дека ПСЖ е фаворит како актуелен европски шампион, но дека Арсенал го заслужува правото да се бори за трофејот.
„Тие ја бранат титулата, но и ние заслужувавме да бидеме тука“, заклучи тренерот на Арсенал.
