Најдобриот српски тенисер, Новак Ѓоковиќ, официјално одлучи да се повлече од Здружението на професионални тенисери (ПТПА), организација за чие основање лично придонесе.
На социјалните мрежи, Ѓоковиќ ги објасни причините за овој неочекуван потег.
„По внимателно разгледување, донесов одлука целосно да се повлечам од Здружението на професионални тенисери. Оваа одлука доаѓа по континуираните загрижености за транспарентноста, управувањето и начинот на кој беа претставени мојот глас и имиџ“, изјави тој.
Тој, исто така, истакна дека е горд на почетната визија што ја споделил со Васек при основањето на ПТПА, која требаше да им даде на играчите посилен и независен глас.
„Сепак, стана јасно дека моите принципи и пристап повеќе не се усогласени со моменталната насока на организацијата“, додаде Ѓоковиќ.
Тој испрати јасна порака на крајот од својата објава.
„Ќе продолжам да се фокусирам на мојот тенис, моето семејство и придонесот кон спортот на начини што ги одразуваат моите принципи и интегритет. Им посакувам на играчите и на сите вклучени се најдобро во иднина, но за мене ова поглавје сега е затворено.“
© Vecer.mk, правата за текстот се на редакцијата
