Натпреварот од последното коло од Групата Ј на Светското првенство помеѓу Алжир и Австрија ќе биде под посебна лупа. Имено, на двете репрезентации им е попогоден пораз поради распоредот што следи во нокаут фазата.
Аргентина го потврди првото место во групата со две победи, а Алжир и Австрија со три освоени бода барем ја обезбедија третата позиција, односно сигурно место меѓу осумте најдобри третопласирани селекции, а сега се случува парадоксална ситуација.
Имено, второпласираните во групата Ј во осминафиналето ќе играат против еден од фаворитите на Светското првенство, Шпанија, додека третопласираната екипа ќе има, на хартија, полесен противник - второпласираната екипа од групата Г, веројатно Иран или Белгија.
За Алжир, математиката е јасна: победата го обезбедува второто место и дуелот со Шпанија; нерешено или пораз, сепак, би можел да го донесе попосакуваното трето место.
За Австрија, пресметката е уште поедноставна - мора да загубат за да паднат на третото место. Со оглед на тоа што финалните натпревари од Групата Ј ќе започнат дури откако ќе завршат сите други групи, обете репрезентации однапред ќе знаат што е во прашање.
Флоријан Едерер, професор по економија на Универзитетот во Бостон и страствен навивач на Австрија, за „Тајмс“ изјави дека обете репрезентации имаат интерес да изгубат.
- Може да се случи да биде подобро за обете репрезентации да не победат во тој последен натпревар - рече тој, додавајќи:
- Запомнете ги моите зборови: ова ќе биде срам за Канзас Сити!
Со таа реченица, професорот Едерер потсети на една од најголемите контроверзии во историјата на Светското првенство, кога во 1982 година, интересно, Австрија и Алжир беа исто така во центарот на вниманието.
Имено, во пресрет на последното коло од групата, минимална победа на тогашната Западна Германија против Австрија ќе ги однесеше обете репрезентации во втората рунда, но во исто време ќе го исфрлеше Алжир од турнирот.
И така беше... Западна Германија рано поведе со 1:0 преку Хорст Хрубеш, а потоа двете репрезентации го поминаа остатокот од натпреварот разменувајќи додавања на средината од теренот, во кои ниту една од екипите не се обиде да направи ништо повеќе.
Алжирците протестираа, но залудно. Сепак, ФИФА ги промени правилата по тој турнир и оттогаш последните натпревари во групата се играат во исто време со цел да се намали можноста за пресметки.
© Vecer.mk, правата за текстот се на редакцијата
