Христијан Мицкоски, претседател на Владата на Македонија упати честитка по повод 5 Мај, Денот кога го чествуваме македонскиот јазик, нашата тивка сила, нашата историја испишана во зборови.
Тоа е јазикот на нашите предци, на нашите песни, приказни и молитви. Јазикот кој не обединува низ генерации и простори, јазикот кој ја носи душата на еден народ што премолчено зборуваше и зборува со достоинство.
Љупчо Сантов запишал:
Јазикот е татнеж на вековите што не смеат да замолчат.
И навистина, секој македонски збор што ќе го изговориме денес е потврда дека постоиме, дека траеме.
Крсте Петков Мисирков, уште во 1903 година, со визија што не обврзува и денес, запиша:
Ние сме за тоа сите во Македонија да се нарекуваме Македонци и нашиот јазик да го нарекуваме македонски.
Блаже Конески, таткото на современиот македонски литературен јазик, не потсети:
Нашиот јазик е нашата голема татковина.
Во тие зборови се скриени сите наши стремежи, болки и победи. Тоа е јазикот на создавање, на отпор и на иднина.
Да го чуваме, негуваме и славиме македонскиот јазик, не само како културно наследство, туку како жива сила што не дефинира и ни дава иднина. Среќен Ден на македонскиот јазик!, напиша Мицкоски на социјалните мрежи.
© Vecer.mk, правата за текстот се на редакцијата
