Во тек се анкетите за кандидати за градоначалници од редовите на ВМРО-ДПМНЕ, потврди премиерот и лидер на партијата, Христијан Мицкоски.
Тој ја прокоментира изјавата на лидерот на СДСМ, Венко Филипче во врска со рејтингот на партијата.
– Мислам дека ако навистина веруваат дека два и пол спрема еден ќе биде разликата ќе бидат непријатно изненадени за 6 месеци, има општини каде што таа ќе биде многу поголема 4:1 таа разлика, една од тие Општини е и оваа, Свети Николе. Така што мислам дека тие што му ги потурнуваат тие анкети на претседателот на СДСМ не му мислат добро – изјави Мицкоски.
Тој го посоветува лидерот на СДСМ да ја погледне реалноста и за 6 месеци колку што преостануваат до локалните избори да ја консолидира и реструктуира партијата.
-И мислам дека прво што треба да направи за да се доближи до пропорцијата два и пол спрема еден е да излезе лично тој и да им се извини на граѓаните во името на СДСМ, за сето тоа што СДСМ го направи изминатите години, распродавајќи го идентитетот, крадејќи ги граѓаните, понижувајќи и засрамувајќи ја Македонија, а посебно на македонскиот народ да му побара прошка за сето она што му го направи изминатите седум години, за да се приближи до тие два и пол спрема еден, пропорција – рече Мицкоски.
Лидерот на СДСМ Венко Филипче изјави дека анкета направена во партијата за претстојните локални избори покажуваат дека сооднос ќе биде 2,5: 1 за ВМРО-ДПМНЕ. Тој рече дека е задоволен од оваа позиција бидејќи говори за подобрување на рејтингот на СДСМ под негово водство.
© Vecer.mk, правата за текстот се на редакцијата
