Владејачката партија ВМРО-ДПМНЕ одбележа 35 години од своето постоење со свечен настан во античкиот локалитет Хераклеја, Битола. Присутните слушнаа пораки за иднината на партијата, како и критики на адреса на опозицијата.
Лидерот и премиер, Христијан Мицкоски, на собирот потсети на важноста функционерите да останат скромни и одговорни кон граѓаните. Тој ги повика членовите да не дозволат власта да ги оддалечи од основните вредности и да се пазат од ароганција и користољубие.
Апелирам до сите наши функционери и членови – не заборавајте кои сте, од каде дојдовте и кому му служите. Никој не смее да дозволи бахатост, агонија од моќ и корист да го заматат погледот. Да покажеме одговорност и волја, и да потврдиме пред граѓаните дека сме различни од претходните власти. Оваа влада ја презеде одговорноста кога состојбата беше кризна, но денес можеме со гордост да кажеме дека нашата земја е една од најбрзо растечките економии во Европа, со четвртиот највисок економски раст на БДП.
© Vecer.mk, правата за текстот се на редакцијата
