Обвинителството бара притвор за неготинец кој му се заканувал со смртни закани на градоначалникот на Неготино, Горан Стојанов.
„Основното јавно обвинителство Кавадарци поведе истражна постапка против едно лице од Неготино за кривично дело Изнуда од член 258, во врска со член 19 (во обид), како и за Загрозување на сигурноста од член 144 став 4 од Кривичниот законик. Кривичните дела ги извршил спрема градоначалникот на Неготино. На 2 септември, од анонимен фејсбук профил му пишал на градоначалникот и со сериозни директни закани кон него и неговото семејство се обидел да го присили да му исплати 3.000 евра. Во периодот од 4 до 18 септември, во неколку наврати осомничениот испраќал пораки со смртни закани на градоначалникот и на официјалната електронска пошта на општината, со што кај оштетениот и неговото семејство предизвикал чувство на несигурност, загрозување и страв“, соопшти Јавното обвинителство.
Бидејќи постојат законските основи – опасност од бегство и можност осомничениот да го повтори делото, јавниот обвинител до судијата на претходна постапка достави предлог за определување мерка притвор, се додава во соопштението.
© Vecer.mk, правата за текстот се на редакцијата
