Македонија минува низ трет екстремно топлотен бран кога температурите во државава одат инад 40 степени Целзијусови, а Скопје ќе се соочи со 37-38 степени наредните десетина дена. Ситуацијата е слична во целиот регион.
Балканскиот регион е погоден од нов топлотен бран. Ова подрачје ќе биде под влијание на термобаричниот гребен и многу топла воздушна маса од север и северозапад на Африка, што ќе предизвика многу топло време, предвидуваат метеоролозите, а оваа ситуација ќе продолжи во текот на поголемиот дел од следната недела.
Македонската УХМР за денеска прогнозира максимални температури од 32 до 39°C низ целата земја. Во главниот град Скопје ќе биде сончево и многу топло, со слаб до умерен променлив ветер. Под влијание на многу топла воздушна маса од југ во текот на следната седмица времето ќе биде претежно сончево и многу топло. Дневната температура насекаде ќе биде над 30°C, а наместа ќе достигне и 40°C.
Топлотниот бран предизвикува високи температури, понекогаш дури и тропски, објави во саботата Институтот за хидрометеорологија и сеизмологија на Црна Гора. Во рамнината Зета-Бјелопавлиќ, максималната температура ќе надмине 40°C.
Во саботата пред пладне беше претежно ведро во Босна и Херцеговина, а според мерењата на температурата на воздухот во 11 часот, највисоките температури беа во Мостар - 33 степени Целзиусови и Требиње - 32°C. Во Сараево, температурата беше 28°C, објави Федералниот хидрометеоролошки институт. Прогнозирана температура до крајот на денот е од 30 до 38°C во јужна Босна и Херцеговина.
Црвен метео аларм во делови од Хрватска
Хрватскиот државен хидрометеоролошки завод издаде предупредување за топлотни бранови што можат да влијаат на здравјето, а за недела, 10 август, прогласи црвено временско предупредување, или ризик од исклучително опасно време за регионот Риека.
Црвено временско предупредување во понеделник и вторник е издадено и за регионите Книн, Сплит и Дубровник.
Портокалово аларм, кој укажува на опасно време, е прогласено за недела за регионите Осиек, Загреб, Карловац, Госпиќ, Книн, Сплит и Дубровник. Слично многу топло време ќе остане во понеделник во поголемиот дел од Хрватска, со температури од 30 до 37°C, во внатрешноста на Далмација до 39°C.
Времето во Србија е сончево и многу топло во сабота, со слаб до умерен, променлив ветер, а температурите ќе се движат од 14 до 37°C, објави Републичкиот хидрометеоролошки завод. Во Белград ќе биде многу топло време со највисока дневна температура околу 36°C.
И за следната недела се предвидува претежно сончево време, со максимални температури на повеќето места од 34 до 38°C, локално и повисоки.
Превенција и заштита на населението
Високите температури на Балканот ќе придонесат за зголемување на ризикот од пожар, ќе го отежнат секојдневното нормално функционирање, затоа експертите препорачуваат почитување на добро познатите заштитни мерки.
Високите температури можат да предизвикаат здравствени проблеми, особено кај чувствителните лица како што се децата, постарите лица, хроничните пациенти и лицата кои работат на отворено.
Навремените превентивни мерки можат значително да го намалат ризикот, а на граѓаните им се препорачува да ги ладат просториите во кои престојуваат, да се држат подалеку од топлината, да го ладат телото и да пијат доволно течности, но и да им помогнат на другите, особено на ранливите групи и на лицата со хронични заболувања редовно да се консултираат со своите лекари.
© Vecer.mk, правата за текстот се на редакцијата
