Ова лето околу 50 училишта низ државата ќе бидат опремени со нови фотоволтаични енергетски системи. Проектот се реализира благодарение на грант во висина од 1,1 милион евра, добиен од Банката за развој при Советот на Европа, во соработка со Министерството за образование и наука.
Воведувањето на обновливи извори на електрична енергија значително ќе ги намали трошоците во училиштата. Освободените финансиски средства ќе бидат пренасочени кон подобрување на инфраструктурата, набавка на учебници и дигитални алатки за учениците. Покрај економските придобивки, ваквата иницијатива ќе има и позитивно влијание врз заштитата на животната средина преку намалување на аерозагадувањето.
Проектот е дел од стратегијата за современо и енергетски ефикасно образование, како и заложба кон натамошни реформи во наставниот процес.
© Vecer.mk, правата за текстот се на редакцијата
