Конгресот на ВМРО-ДПМНЕ во Кавадарци доби значајна европска димензија: според извори од партијата, премиери и лидери на десноцентристички партии од Европската народна партија упатија пораки што ја нагласуваат важноста на политичката стабилност во Македонија и нејзината улога во регионот.
Најсилната изјава, според делегатите, пристигнала од премиерот на Хрватска, кој порачал:
„Македонија има раководство што знае каде оди. Ова е момент кога европската перспектива може да стане реалност, а Хрватска ќе биде ваш искрен партнер на тој пат.“
Овој настап бил оценет како јасен сигнал дека Загреб ја гледа Македонија како сериозен фактор во регионалната стабилност и европската агенда.
Лидери на сестринските партии од Италија и Словенија исто така испратиле поддршка, истакнувајќи дека реформскиот модел што го предлага ВМРО-ДПМНЕ е „систем што се доближува до европските стандарди на функционална државност“.
Според нив, Македонија демонстрира политичка зрелост и конзистентност што ретко се гледала во последната деценија.
Од Германија, претставници на Христијанско-демократската унија (ЦДУ) потенцирале:
„Стабилноста, владеењето на правото и модерните институции се основа за секоја европска држава. Македонија сега се движи во насока што може да донесе долгорочни резултати.“
ЕНП, како најголемо политичко семејство во Европа, испрати порака во која се вели:
„Граѓаните на Македонија заслужуваат ефективна држава, јасни стандарди и стабилна иднина. Стратегијата до 2030 година е чекор што ја носи земјата поблиску до европското политичко и економско јадро.“
Во завршниот дел од меѓународниот блок, свое видео-обраќање испратил и унгарскиот премиер Виктор Орбан, кој накратко ја поздравил организацијата на Конгресот и порача дека „стабилните партнери во регионот се од клучно значење во сложените геополитички околности“.
Според партиски извори, ова е најсилниот меѓународен „ветер во грб“ што ВМРО-ДПМНЕ го добила на партиски конгрес во последната деценија, сигнал дека Македонија повторно се позиционира како земја со предвидлив политички курс и европска ориентација.
© Vecer.mk, правата за текстот се на редакцијата
